कागद राजस्थानी

गुरुवार, 30 जून 2011

मूंगीवाडै़ रा दूहा


मूंगीवाडै़ रा दूहा



























चूल्हो मांगै गैसड़ी, गैस मांगै नोट ।
टाबर मांगै रोटड़ी,चाबै बैठ्या होट ।1।
रसोई मांगै आटो ,रोटी मांगै साग ।
थकां नोट नीँ बापरै,भूंडा देखो भाग ।2।
मुंगीवाड़ो जीमग्यो,आटो कांदा दाळ ।

किण नै देवां ओळमा, किण नै काढां गाळ ।3।
राज चलावै आप री, जनता बोकै आज ।
हाड कुटावै बापड़ी, रोटी मिलै न प्याज ।4।
नेता भेज्या छांटगै, बण बैठ्या सरताज ।
लूट कमावै नोटड़ा,आवै कोनीँ बाज ।5।
लोकराज रै आंगणै, पूग्या डाकू चोर ।
दोनूं हाथां लूटगै, घोरका करै और ।6।
लोकराज सूं धापग्या, चालो अब परलोक ।
सोरो रैसी जीवड़ो, भूख मरण पर रोक ।7।

लोकराज मेँ बापजी,चालै कोनीँ जोर ।
कुणसो थरपां पाटवी, नेता सगळा चोर ।8।
लोकराज तो भायला, है कौरव पंचाट ।
मांगण ढूकां न्याव तो, फोड़ण भाजै टाट ।9।
लोकराज रै बारणै, ऊभ्या नुगरा प्रेत ।
हया दया सा बेचगै, भूल भालगै हेत ।10।
लोकराज रै खेल मेँ,जनता पांती हार ।
नेता पांती नोटड़ा,जनता पांती मार 11।।
लोकराज मेँ नेतड़ा, बण्या पूरा लठेत ।
ना बै पाळै दोसती, ना बै राखै हेत |12।
हेत प्रीत सा छोडगै, नेता भोगै राज ।
गांधी बाबो सूंपग्यो,जीमसी लोकराज । 13।
बोलो मत ना बापजी, बगत कुजरबो आज ।
लुळ लुळ घालो बोटड़ा, चालसी लोकराज । 14।

हाथ हालै न टांगड़ी, ढीली पड़गी राफ ।
बोटां आळी टैम मेँ, नेता बोलै साफ ।15।
आंख्या आडा काच है , टांगा भीतर राड़ ।
नोटां आळै खेत मेँ,सीधा कूदै बाड़ ।16।
कुरसी आं री राम है , कुरसी ही करतार ।
कुरसी खुसती देखगै,भूंडी खावै खार । 17।
काको ल्याओ काकड़ी, कियां बणावै साग ।
लूण मिरच सै खूटग्या,चूल्ह8 कोनीँ आग । 18।
गा रो बांटो खूटग्यो, मा रो आटो लूण ।
बापू पड़ग्यो बैसकै ,टाबर मांगै चूण ।19।

बिजळी आई गांव मेँ, मेट्यो सो अंधकार ।20।
बिल्लड़ा आयां हाथ मेँ,मचग्यो हाहाकार ।21।
मुंगीवाड़ै बापजी, जीणो करियो हराम ।
भाड़ा बधग्या मोकळा,छोडां कूकर गाम । 22।
बीजां कांईं खेत में, बीज मिलै ना खाद ।
खावण दाणां खूटिया, आ न्यारी अळबाद ।23।
 
हाड कुटावां बापजी,बणै न कोई बात ।
मूंगीवाड़ो भूंडियो,भूखी काढां रात ।24।
खरची खूटी गांठ री,मूंगीवाड़ै पाण ।
रोटी होई आंतरी,कूकर बचसी प्राण |25 
|रोटी दोरी रामजी,मूंगीवाड़ो धाप ।
रसोई मिनख जीमगी,कुण रो लाग्यो श्राप |25।
भूख सतावै डावड़ां,आडी आवै स्यान ।
मूंछ अडाणै राखद्यूं,मिल जावै जे धान ।26।
मारण ढूक्या नेतिया, खोसी जीवण आस ।
मुंडां चाती चेपदी, घालै कोनी घास ।27।
 
लोकराज इण देसड़ै, नेता लेग्या खोस ।
आपां टेक्या बोटड़ा , किण नै देवां दोस ।28।
नेता ले गै बोटड़ा , बैठ्या भोगै राज ।
थारै पांती कूकणो ,सुणलै बेली आज ।29।
रोटी गाभा झूंपड़ा , मत ना मांगो आप ।

ऐ चीजां तो भायला, नेता खावै धाप ।30।
नेता रै घर जामसी , नेता पाछो काल ।
थारै थूं ई जामसी, सुणलै मेरा लाल । 31 ।
नोट कमासी बापड़ा, बोट नोट रो मेळ ।
मरजी आं री आपरी,कुणसो भेजै जेळ । 32 ।
 
राज चलावै बापड़ा, धर नेता रो भेस ।
असल काम है लूटणो, छोड्यां लागै ठेस ।33।
नेतण जाम्यो डीकरो, नेता घर मेँ मोद ।
गांव बापड़ो अणमणों, दाता खावै रोद ।34।
नेता मरग्यो मौत सूं, नेतण होगी रांड ।

बोटां आळी टैम में, झोळी दीन्ही मांड |35।
थारै पांती रोगड़ा , बां रै पांती राज ।
थारै पांती कूकणोँ , बां रै पांती इलाज ।36।
लोकराज रै आंगणै , थांरो कांई काम ।
ले लै माळा काठ री, भज लै सीताराम ।37।
घाटा पूरा पूरसी , नेता रामूराम ।
बोट जुगाड़्या बापड़ै, पूरा देगै दाम ।38।
नेता री माया बडी, नित रा कूटै दाम ।
माया भिळगी राज मेँ, अब कांईँ करसी राम ।39।

मुरधर जागी आस


मुरधर जागी आस
     [ बिरखा रा दूहा ]






















धोरा पाणी चूसग्या, पड़तां पै'ली छांट ।
थळी सा सुक्की राखदी,बादळ क्यां री आंट ।1।

पांत दुभांत होयगी, बादळ थारै हात ।
मुरधर इकसर सीँचदे,फेर बणैली बात ।2।

आबू तरसै मोरिया, बरसो धारमधार ।
पांखां खोलगै नाचलै,देवो नीँ समचार ।3।
ताळ तळाई सूकगी, कूआ गया पताळ ।
खोल खजानो बादळी,मेटो नी जंजाळ ।4।

च्यानण चासो बादळी, देखो आंख पसार ।
सुक्की मुरधरा तड़फड़ै,छांटां करो अपार ।5।
 
सावण बरस्यो सांतरो,नीँ हाथां मेँ बीज ।
बिन दाणां रै बापजी,निकळी आखातीज ।6।

टप टप टपकी टापरी,छूटी हाथां छान ।
भाज बचाई बापजी,जाती जाती ज्यान ।7।

डांगर ऊभा तड़फड़ै,मालक मरजी जाण ।
बिरखा रै दिन आपणां,खाली कूकर ठाण ।8।
आकळ बाकळ टाबरी, आकळ बाकळ आप ।
बिरखा मेँ फोड़ा घणां,आवै कोनीँ धाप ।9।

बद बद बरसो बादळी, मुरधर करसी लाड ।
बिरखा रै सनमान मेँ,आंख्यां राखी गाड ।10।

बिरखा बरसी सांतरी, मुरधर जागी आस ।
कोठा भरसी धान रा ,डांगर चरसी घास ।11।

हाळी हळड़ा सांभिया, साथै साम्भ्या बीज ।
खेतां ढाणी घालसी , स्यावड़ गई पसीज ।12।

ऊंचै धोरै बाजरी, ढळवोँ बीजूं ग्वार ।
बिच्च बिच्च तूंपूं टींढसी, मतीरा मिश्रीदार ।13।
ऊंचै धोरै टापरी, साथै रैसी नार ।
दिनड़ै करां हळोतियो, रातां बातां त्यार ।14।

काचर काकड़ कीमती, मतीरा मजेदार ।
मोठ मोवणा म्होबला, धान धमाकैदार । 15।
 


खेजड़ हेटै पोढस्यां,पेड्डी टांगां पाग ।
सुपणां मीठा आवसी,आथण आसी जाग ।16।
टीकड़ सिकसी राख मेँ, हांडी पकसी साग ।
ढाणी ठाठां लागसी, अब जागैला भाग ।17।

कड़बी गासी गीतड़ा, ग्वार सारसी राग ।
मुरधर मजमा लागसी, जद जागैला भाग ।18।
रात्यूं काढां गादड़ा,दिनड़ै डांगर ढोर।
मतीरा खावां दिनड़ै ,रात नै सिट्टा मौर ।19।

तिलड़ा तुरता तिड़कसी, बाजर देसी साथ ।
मोठ मरजी मानसी, जद लागांला पांथ ।20।
 


आभै गाजी बादळी, मुरधर नाच्या मोर ।
जीया जूण खिलखिली,देख घटा घनघोर ।21।

आभै चमकी बीजळी, मनड़ै जाग्यो मोह ।
बादळ राजा बरससी, मिटसी पिया बिछोह ।22।

छमछम बरसै बादळी, धम धम नाचै मोर ।
धरती माथै रूंखड़ा, घालै घूमर जोर ।23।
बादळ ऐड़ा ओसरया, मुरधर करियो वास ।
धरती आली सांतरी, करसां पूरी आस ।24।

डेडर जीभां खोल दी, भरिया देख तळाब ।
कोयल वाणी सांचरी, मुरधर उमड़ी आब ।25।
 
लूआं छोडी आंचड़ी, बादळ दी फटकार ।
होय बायरो हेमाणी, करै जीव सतकार ।26।

मुरधर लेवै वारणा, सीतल करनै देह ।
बादळ राजा धारगै, नित बरसाओ मेह ।27।

पान फूल स्सै पांगरै, पड़तां देखो छांट ।
बादळ मै'मा सांकड़ै,रङ्ग बदळै किड़कांट ।28।
रो'ई न्हाई मेह में, हरखी धरती घास ।
रूंख तिसाया नीँ मरै, मुरधर छाई आस ।29।

घड़ड़ घड़ड़ घड़ बादळी,आज चढी आकास ।
चोगड़दै चिग पांगरै, मुरधर पाळी आस ।30।
 

बरस बादळी आज तो, आबू माथै जाय ।
भीज्यां आबू मेह मेँ , मोर नाचसी आय ।31।

मोर सूत्या आबू में, बिन बोल्यां सै आज ।
बिरखा करदे बादळी,मोर बोलसी भाज |32।

आबू डूंगर मोवणो, मोर ढेलड़ी पाण ।
बिन बिरखा रै बादळी, मोर छोडसी प्राण । 33।
मोर बोलै आबू मेँ, बादळ रो ले नाम।
कर दे बिरखा बादळी,नीँ लागैला दाम ।34।

आबू पा'ड़ सुवावणो,उत जे बोलै मोर ।
नाचै पांख पसारगै, लेज्या चित्तड़ो चोर ।35।
 
लूआं बाजी मारणीँ,भाजी उड़गै रेत ।
बरसण लागी बादळी, पाछी घाल्यो हेत ।36।

पिव परदेसां पूगिया, जाप काळ रो नाम ।
बरसण ढूकी बादळी, आय पधारया गाम ।37।

माया सगळी आपरी, बादळिया सरकार ।
थारै बरस्यां बाप जी, नीँ धारां करतार ।38।
करज उतारां सेठ रो, बैयां देवां फाड़ ।
बिरखा कर दे बादळी, मेटां सगळी राड़ ।39।

धोरा हरखै मोद मेँ, बांथां भरगै छांट ।
मुरधर रै सनमान मेँ,बादळ छोडी आंट ।40।

गुरुवार, 23 जून 2011

बिरखा रा दूहा

 बिरखा रा दूहा


 















मानसूनड़ो रुळ परो, होग्यो अब सुन्नमान ।
बिरखा कूकर बरससी, कियां निपजसी धान ।1।
धोरी पाळी आसड़ी, टूटै पड़तख आज ।
बिरखा करदे बादळी, मधरी मधरी गाज ।2।
बादळ थारै कारणै , कळपै मुरधर माय ।
बरसा दै जे छांटड़ी, कळी कळी खिलजाय ।3।
पाणी साम्यां बादळी, डोलै अंबर जाय ।
लाड लडावां मोकळो,बरसै क्यूं नीँ आय ।4।
आभो छोडो बादळी, बैठो मुरधर आय ।
नित रा लेवां वारना, लेवां गळै लगाय ।5।


 



















बरसै जे अब बादळी, मुरधर निपजै धान ।
नाम उजाळै राज रो, चौगड़दै सनमान ।6।
बिजांत होवै आगली, बिरखा राखै लाज ।
बिन बिरखा रै बादळी, कूकर ढकसी लाज ।7।
बाबो मांगै बाजरी, माऊ मांगै मतीर ।
बिन बिरखा रै बादळी, कूकर धारै धीर ।8।
चालै नीँ जद पावली ,राजा बणै बजीर ।।
बिरखा कर दे बादळी,मानां थारी नज़ीर ।9।
हाड तुड़ाया हाळियां, कर कर धरती पाड़ ।
बिन बिरखा रै बादळी, किंयां बणै जुगाड़ ।10।





























धरती रोप्या दाणियां, मनड़ै धार विचार ।
बिरखा थारै कारणै, डूब्या काळी धार ।11।

बादळ अबकै बरसज्या, मानांला उपकार ।
नीँ बरस्यां तो भायला, छोडांला सतकार ।12।
गांवां बांटी सीरणीँ, बादळ थारै नांव ।
नीँ बरस्यो जे भायला, थारो नांव कुनांव ।13।
पाणीँ पताळ सूकियो, धरती हाथां हार ।
बादळ थारै कारणै, मुरधर खावै मार ।14।
बात विचारो बादळी, पाणीं निपजै धान ।
बिन बिरखा रै बादळी, मुरधर खोवै मान । 15 ।


 
 


























तड़ तड़ बूंदां बाजसी,तड़ड़ तड़ड़ गळियांह ।
बादळ थारै बरसियां , झड़ड़ झड़ झड़ियांह ।16।
बीजळ कड़कै बारणै, भीतर भड़कै भाव ।
बादळ राजा बरससी, दाता लीवी धार ।17।
मोरां पांखां साम्भली, कोयल होगी त्यार ।
बादळ थारै वासतै, मुरधर सांभ्यो प्यार ।18।
करसां बीज कबाड़िया, माथै करजो धार ।
थूं तो खाली बरसज्या,बादळ बण करतार ।19।

चावां मांडै चंवरी, धीवड़ दै परणाय ।
ऐक आसरो बादळी, दाणां दे निपजाय ।20।

गुरुवार, 16 जून 2011

लू रा दूहा


लूआं चाली कोझकी,






























लूआं चाली कोझकी, मुरधर तपियो ताप ।
बिरखा करदे बादळी, नीँस लागसी पाप ।1।


लूआं मारी लूंकड़ी , हिरण तिसाया धाप ।
गांव उंचाळो घालियो , मुरधर घर संताप ।2।

लूआं लूंटी जूणती, मुरधर लागी लाय ।
बादळ थारी आसड़ी , बरसै क्यूं नीँ आय ।3।

तपै अकासां तावड़ो , मुरधर सिकती जाय ।
बादळ थारी आस मेँ , धोरी मरतो जाय ।4।

छांटा कर दे बावळा , कर दे थारो काम ।
धोरी खूब उजाळसी , बादळ थारो नाम ।5।

चीड़ी छोडै आळणोँ , मरै भच्चीड़ा खाय ।
पाणी लागै हाथ नीँ , जूण चक्कर मिट जाय ।6।

देख तिसायो मानखो , सुण बादळ समचार ।
बिरखा कर दे सांतरी , कर नीँ थोड़ो विचार ।7।

सांडो मरग्यो सूकगै , सुगन पाळतो धाप ।
लूआं बिलां ढूकगी , बादळ लुकिया आप ।8।

ताळ तळायां निरजळा, कूआं ऊंडी धार ।
बादळ बेगो आयज्या , लूआं देसी मार ।9।

तपतो तन मन तड़फड़ै, लूआं लियो लपेट ।
रो'ई ज सुन्नी सूकगी , डांगर खाली पेट ।10।

मोह पांगरै मेह मेँ, तज आवै परदेस ।
बादळ बीरा बरसज्या, प्रीतम आवै देस ।11।

बुधवार, 15 जून 2011

गरमी रा दूहा


धरती तपगी सुरजड़ा


















धरती तपगी सुरजड़ा, कोजी थारी आंच ।
चिड़ी कागला तड़फड़ै,खोलै कीकर चांच ।1।


पान फूल सै झुळसिया, गयो मिनखड़ो हार ।
नभ थळ पाणी चूसियो, मुरधर सेवै मार ।2।

सीवण बूई फोगड़ा,मुरधर रो सिणगार ।
सगळा नै तू झपटिया, बैठी मनड़ो मार ।3।

ऐक बिचारी खेजड़ी, डटी सामने आय ।
मुरधर लागी काळजै,जीया जूण बचाय ।4।

बादळ थारो भायलो, मुरधर रो भरतार ।
बेगो नीचै भेजदे, मानांला करतार । 5 ।

रूंख तिसाया आथिया, गया बापड़ा सूक ।
मोर नाचणां भूलिया, कोयल भूली कूक ।6।

काछबा बण्या टोपसी, सुरजी थारै ताप ।
आप कमावै बावळा,बिरम हित्या रो पाप |7।

आभै थारो राज है, धरती ताणीँ मार ।
मुरधर नै तूं बगसदे,क्यांनै खावै खार ।8।

बाळू आवै उठ परी , थारो करै सतकार ।
कण कण इण रो भेयदे, कर बूंदां बोछार ।9।



शुक्रवार, 10 जून 2011

अरथाऊ दूहा-


 
        गांधी थारै देश में

























चोरड़ा चलाक चातर, चोघा घणा हराम ।
नेता म्हारै देस रा,राम बचावै राम ।1।

बाबा थारी भोडकी , कियां खायगी भांग ।
नोट कढावै काळिया, कूकर पूरै मांग ।2।

चोसठ सालां लूटगै, नेता कूट्या दाम ।
बाबो काढै सैँत मेँ, नेता चेप्या डाम ।3।

दिल्ली दिलड़ो देस रो, कुणसो कैवै आज ।
नेता ठोकै डांग री, जान बचाओ भाज ।4।

लोकराज रै च्यानणै, आज मच्यो अन्धकार ।
नेता जीमै नोटड़ा,जनता खावै मार ।5।

चोरटा बण्या राजवी,धाड़वी है दलाल ।
राजा बैठ्यो मौज मेँ,जनता करै सुवाल |6।

चोरटा चेप काळजै,  राज भरै हुंकार ।
जनता आं नै धोकलै,नीँ धोक्यां है मार |7।

गांधी थारै देश में, नेतां घाली राध ।
धाप कमावै नोटड़ा, चोगड़दै अपराध ।8।

गांधी थारै देश मेँ,रुळगियो लोकराज ।
नेता होग्या निसरमा, माटी रुळगी लाज ।9।
गांधी छपग्यो नोटड़ां , बण्यो नेतां री स्यान ।
अब जे आवै साम्हनै,उणरा खोसै कान ।10।

गांधी थारी अहिँसड़ी, खोई खुद री धार ।
धरणै बैठ गरीबड़ा, नित री खावै मार ।11।

गांधी थारी समाधी, थरप दी राजघाट ।
दिन मेँ धोकै नेतिया, रातां ठाटमठाट ।12।

गांधी थारा बांदरा, धोळा पैरै बेस ।
आं रै सांकळ घाल दे, बेच न्हाखसी देस ।13।

गांधी थारै देसड़ै, संत कुटीज्या आज ।
भारत माता थारली,कियां बचावै लाज 14।

राज चलावै सोनिया, देखै है सरदार ।
मंत्री भूंसै रोब सूं, कोई न जिम्मेदार ।15।

मनमोहन थारो राज, कोजो घणो खराब ।
धरमी खावै लाठियां, गुंडा मुंडै आब ।16।

चमचा चूसै चासणी,नेता खावै माल ।
जनता कूकै गूंग में, बोलो सतश्रीकाल ।17।

गुंडा बैठ्या राज मेँ, पूरा लेवै ठाट ।
जनता मांगै रोटियां, फोड़ण भाजै टाट ।18।

कुरसी बैठ्या चोरटा,धर नेता रो भेस ।
नोट कमावै देसड़ै, मेलै जाय विदेस ।19।

लेखक मांडै लीकट्यां, थांनै आवै दाय ।
मजोस आवै उण घड़ी, ढूकै नेता जाय ।20।

नेता जीव कुजीवड़ो, देवै फीँच पड़ाय ।
कुरसी पेटै मावड़ी, बेचै मंडी जाय ।21।

ऐ पधारया आंगणै,    म्हारै रितुराज ।
बिरखा अळगी भाजगी, तप्यो तावड़ो आज ।22।

दिल्ली होयगी मारणीं, थारी ओ रितुराज ।
दूरज बैठ्या धोकस्यां , राखस बरणों राज ।23।

भाग बदळसी सोचतां,होग्या चोसठ साल ।
रोटी रोटी रोंवतां,हाडां चिपगी खाल |24।

बोटां जाम्या नेतिया, बोटा करसी आज ।
खोटा होग्या भूंडिया, कुण बतळावै आज ।25।

कविडा कुबधी कागला , ऊंडी मारै चांच |
सुधरै तो सुधरै नईं, सुधरो देवै टांच |26|


आंख्यां मीँच्यां चिड़कल्यां,बैठी मनड़ो मार ।
राजा रोसै रोज रो, ना पूछो करतार ।27।


गोविन्द जेड़ा खालसा , आवै पाछा आज ।
दसा सुधारै देश री , चिड़्यां लड़ावै बाज ।28।


दाता तो पाता भया, पाता गया पताळ ।
जीवण दोरा जीवणां , खोस्या रोटी दाळ ।29।


रोटी मागी रामजी, सोटी पड़गी आय ।
जीणोँ दोरो देसड़ै , राम बचाओ आय ।30।


अल्लाह थारी बातड़ी, कुणसो मानै आज ।
रहम न बांटै थारलो, खोस्यां बैठ्यो राज ।31।


बापू थारा बांदरा , धूमस घालै रोज ।
जनता बैठी भूख मेँ, संसद खावै भोज ।32।


नानक राम रहीम रा , बंदा देखो आप ।
रोटी खोस गरीब री , कर बैठ्या धणियाप ।33।

नेता जीव कुजीव है, कुरसी उण रो राम ।
कुरसी छूट्यां बापजी, होवै काम तमाम ।34।

धरम भिड़ावै नेतिया, जातां दै सुळगाय ।
कीँ बोटां रै कारणै, माणस दै मरवाय ।35।

बाबा कुणसा घाट है,घाट घाट धणियाप ।
माळा फेरै राम री, रोज कमावै पाप ।36।

जनता घालै घाट नीँ, लालच मरती जाय ।
उणनै टेकै बोटड़ा . खाल जको है खाय ।37।

मंगलवार, 7 जून 2011

हाइकू


हाइकू ई हाइकू


[]-ओम पुरोहित कागद
  

 [ 1 ]
चारूं कूंटां है
खड़ी भींतां ई भींतां
आदमी कठै ?
 
[ 2 ]
मरजी थांरी
फरमान आपरै
चालै है सांसां ।

[ 3 ]
जग री राड़
मिटै मिनखां मतै
कठै है मतौ ?

[ 4 ]
सिर गिणल्यौ
बगै है आ दुनियां
पग उठायां ।

[ 5 ]
भेजौ कविता
छपै जागती जोत
बांचसी कुण ?

[ 6 ]
नूंईं कहाणी
लेखक री खेचळ
बोदी डकार ।

[ 7 ]
लुगाई जात
प्रेम रो सागर
डूबै जगत ।


[ 8 ]
मोह बादळ
सावण री बिरखा
मा रो परस ।

[9 ]
घंटी खडक़ै
टण टणण टण
नीं जागै देव ।

[ 10 ]
बोदिया बांस
नीं टिकी बा छात
पडग़ी धच्च ।

[ 11 ]
थांरी सोगन
परभात हो ई सी
म्हारी सोगन ।

[12 ]
अंतस पीड़
ऊबळी खद बद
टपकी आंख्यां ।

[ 13 ]
पीळा पानड़ा
हवा सूं बतळावै
झड़स्यां अब ।

[ 14 ]
घर रो मोह
कदै नीं छूटियौ
छूट्या बडेरा ।

[ 15 ]
आया बातां में
भर दी सै ढोलक्यां
पडग़या वोट ।

[ 16 ]
करग्या कोल
पाछा ई नीं बावड्या
चूकग्या दिखां ।

[ 17 ]
अंधारो घणो
चाईजै जे चानणौं
कर खटकौ ।

[ 18 ]
ऊंचौ है आभौ
मिल ई सी मंजल
पग तो उठा ।

[ 19 ]
सिराध नेड़ा
अब  टळसी टंक 
मिलसी नूंता ।

[ 20 ]
जूनी झूंपड़ी
बिरखा अणथाग
भीतर टोपा ।

[ 21 ]
मंजल दूर
पूगणौ बी लाजमी
बिसाईं छोड ।

[ 22 ]
फूटरौ मुंडौ
आरसी मुंदगियौ
करड़ कच्च ।

[ 23 ]
खोपड़ी फूटै
सुण जग री बातां
सुरडक़ चा !

[ 24 ]
चुप हा जितै
देवता गिणीजता
बोल्यां मिनख ।

[ 25 ]
थां री बकरी
परायौ खेत चरै
दूई देखाण !

[ 26 ]
झीणा जे गाभा
मन ऊजळौ राख
उल्लू रा पट्ठा !

[ 27 ]
किताबां पढ
लिख नां ओ कूटळौ
रूंख बकसी ।

[ 28 ]
कित्ती ई लिखी
कित्ती न कित्ती छपी
ले लै ईनाम ।


[ 29 ]
दुनियां घूम्या
कोई नीं सुणै बात
घर ई भलौ ।

[30]
गयौ सूरज
पूरब सूं पच्छम
अंधार घुप्प ।

[ 31 ]
बातां भोत है
करां तो करां किंयां
सिर रौ डर ।

[ 32 ]
देखता जितै
उतरगी फोटूड़ी
घरड़ घच्च ।

[ 33 ]
धरती फाड़
निकळ्यौ भंपोड़
अरड़ झप्प ।

[ 34 ]
फाटक माथै
आंवता ई खुलियौ
चरड़ ड चूं ।

[ 35 ]
बोल देखाण
अणबोली कूकर
भासा दिराव ।

[ 36 ]
धरम निभै
गऊ माता आपणी
बाखड़ी रूळै ।

[ 37 ]
परमेसर
पंच-सरंपचड़ा
जे नीं जीतै तो ?

[ 38 ]
चढै परसाद
धाप गिटै पुजारी
देवता मून ।

[ 39 ]
संपादक जी
रोज लिखै कविता
आप ई छापै ।

[ 40 ]
चाळीस पोथी
ईनाम नै उड़ीकै
बण कामरेड !
Related Posts Plugin for WordPress, Blogger...