कागद राजस्थानी

गुरुवार, 1 नवंबर 2012

पांच दूहा भिस्टवाड़ै रा


==============
अन्ना बापड़ो ऐकलो , भिस्टड़ा है अणथाग ।
लाम्पो लेय लगाय दे, जनता आं रै आग ।1।
कुरसी बैठ कूड़ कथै, कुरसी छूट्यां सांच ।
कुरसी आं री खोसल्यो, साल न देवो पांच ।2।
करै दलाली   निसरमा,   जीत परा चुणाव ।
मूंघा  बेचै  कोयला ,   जेबां  घालै  भाव ।3।
राम  रुखाळो  देस  रो,  काटै  नेता  कान ।

जनता बैठी गूंग में, किंयां बचसी स्यान ।4।
सांची  मानो  बातड़ी,  नेता  जी  रा  बोल ।
जनहित में जे जीमग्या, खोलो मत ना पोल ।5।

घेसळो

भागी ल्याओ ऊंदरी
सांकळ लिँधी बांध
थाणेदार रै
चढ्यो बुखार
पटवारी नै बुलाओ रै
मास्टर री
बदळी करावां!

घेसळो

दिल्ली में
गाज्या बादळ
छांट पड़ी गुजरात
टाबरो
टीवी लगाओ रे
भैँस री
धार काढां!

Related Posts Plugin for WordPress, Blogger...