कागद राजस्थानी

शुक्रवार, 21 जून 2013

* -भाषा खातर-- सतलड़ी*

अणबोल्या अब मरां कोनीँ ।
डरावणियां सूं डरां कोनीं ।
ले गै रैस्यां मात भाषा ।
पग तो पाछा करां कोनी ।।
भाषा खातर दिल्ली जास्यां। 

खाली हाथां फुरां कोनीं ।।
झांसा देय टोरया म्हांनै ।
अब टोरो तो टुरां कोनीं ।।
भाषा अब देवणी पड़सी ।
सुक्कै झांसां पसरां कोनीँ ।।
भाषा आळी टाळो मांग ।
म्हे कोई मसखरा कोनीँ ।।
म्हारै पचै म्हारी भाषा ।
दूजी भाषा जरां कोनीँ ।।

दूहा

काज करण नै थरपियो, जनता खुद रो राज ।
लाज सरम तज नेतिया ,ढूक्या करण अकाज ।।

OOO ओ म्हारो गांव है OOO

ओज्यूं पींपळ री छांव है
मघली-जगली नांव है
बूक हथाळ्यां ठांव है
हां जी, ओ म्हारो गांव है !

जद दिन बिसूंजै
जगै दीया
चांद रै चानणै
टींगर खेलै दडी़ गेडिया ।
बिजळी रै खम्बां
भैंस बंधै
तारां री बणै तण्यां
बिजळी रो खाली नांव है
हां जी, ओ म्हारो गांव है !

करसां बोवै
साऊ खावै
बापू रै नारां रो
गांव में खाली नांव है
बिजळी कड़कै
ठंड पडै़
करसां खसै खेत में
खातां में ज़मींदार रो नांव है
हां जी, ओ म्हारो गांव है !

अंगूठां री नीं सूकी स्याई
मघली जाई
जगली परणाई
मा गैणां रख रिपिया ल्याई
साऊकार री बै’यां में
म्हारी सगळी पीढी रो नांव है
गांव सगळो पड्यो अडाणै
बैंकां रो खाली नांव है
हां जी, ओ म्हारो गांव है !


क-मानै करज़ो
ख-खेतां खसणो
ग=गरीबी
घ-घरहीण
इस्सी बरखडी़
गांव री चौपाळ है
पांच सूं पच्चीस रा टींगर
खेतां-रो’यां चरावै लरडी़
माठर फ़िरै सै’र में
गांव में स्कूल रो खाली नांव है
हां जी, ओ म्हारो गांव है !

अणखावणां-अणभावणां
बणै नेता बोटां रै ताण
ठग ठाकर है म्हारा
गेडी रै ताण
अडाणै री कहाणी कै 
खेत दबाणै री बाणी दै
घेंटी मोस बोट नखावै
जीत परा फ़ेर ढोल बजावै
लोकराज रो खाली नांव है
हां जी, ओ म्हारो गांव है !

अंटी ढील्ली
खेत पाधरो
अंटी काठी
खेत धोरां पर
अळगो-आंतरो
मंतरी री सुपारसां
खेत मिलै सांतरो
खेत-खतोन्यां
हक-हकूतां
ज़मींदार रै हाथ में
गांव बापडो़ फ़िरै गूंग में
चारूं कूंटां पटवारी रो दांव है
हां जी, ओ म्हारो गांव है !
                   

भाषा बोलो आपरी

राजस्थानी हो ?
हो तो- 
राजस्थानी पढो !
राजस्थानी लिखो !
राजस्थानी दिखो !
ना आवै तो
राजस्थानी सीखो !
राजस्थानी बोलो !
संको क्यूं ?
आ आपणीं मायड़ भाषा है !


*
भाषा बोलो आपरी, छोडो मन री लाज ।
चालो चालां मांगबां ,खोस्यां बैठ्यो राज


*तंत*


धोळा काळा कर लिया,जवान होग्या कंत ।
गोडा ओज्यूं बूढिया , कोनीं आयो तंत ।। 
गोडा मांगै गेडियो, ऐनक मांगै आंख ।
लाल गाभा देखगै, डोकर काढै पांख ।।

=========================

*सावण*

सावण आयो सायबा, मत ना जाओ दूर ।
सेजां पोढो आयनै, छोडो सगळा टूर ।।
तनड़ो सारो भीजग्यो, मनड़ो गावै गीत ।
साजन भेळा नाचल्यो , बणगै मन रा मीत ।।
अंबर गाजै बादळी, मनड़ै नाचै मोर ।
साजन म्हारा आंतरा ,रत्ती न चालै जोर ।।
आभै देखूं बादळा , हिवड़ै उपजै नेह ।
साजन होवै साथ मेँ , भळ बरसो थे मेह ।।
चंदै लिपटी बादळी , आभै देखूं भाज ।
घरां पधारो सायबा , काया छोडूं आज ।।

*बातां सरदी री *

दिनड़ा ताता रातां ठंडी ।
पै'रां सूटर छोडां बंडी ।।
छींयां सूती टांगां पसार ।
सूरज भाज्यो छोड बरंडी।।
ठंडा छोडो ताता खाओ ।
सूरज दे दी अब तो झंडी।।
खारक घेवर खाओ भाया ।
लेवण चालां चालो मंडी।।
पगां उभाणा मतना चालो।
चालो घर नै पकड़ो डंडी।।
घरां उडीकै थारी मरवण ।
सांमी आसी बणगै चंडी।।

*अजादी री कुचरणीँ*


1.
हाल
घूंघट काढै दादी
कठै है अजादी ?
2.
कोई सासू
हाल नीँ देवै
भू नै अजादी !
3.
थकां जीन्स
नेतावां नै
पै'रणीं पड़ै खादी
कठै है अजादी ?

पंचलड़ी

मसळ आंखां जाग बता ।
कुण लगाई आग बता ।।
पड़ी चादर मैल जमी । 
कुण लगाया दाग बता ।।
कुण देसी रोटी अठै । 
कुण घालसी साग बता।। 
खावै बै बैठ्या माल ।
अठै फूट्या भाग बता ।।
इण नगरी दोरी जूण ।
जैरी कित्ता नाग बता।।

कांईं करां

मिलै जको भावै कोनीं ।
भावै जको मिलै कोनीं ।।
चावै जको चावां कोनीं ।
चावां जको चावै कोनीं।।
साम्हीं जको दाय कोनीं ।
दाय जको साम्हीं कोनीं।

ताता-ताता दूहा

मिनखपणै रा बोरिया, बण्या भूंगड़ा आज ।
बिलखै जाई बेटियां , सूत्यो मिनख समाज ।।
धन कमावै रीत सटै, मुंडै न रत्ती लाज । 
धूड़ बरोबर तुल सकै, आंधो होयो समाज ।।


.
बरफ पड़ी कसमीर में, धूजियो राजस्थान ।
धोरा होया हेमला , ठाठरगी ही जान।। ,

आपां पुतळी काठ री, नेता हाथां डोर ।
नाच दिखाओ भायला, चालै कोनीं जोर ।।


==========
बोट पड़ैला देसड़ै,नेता होर्‌या त्यार ।
बदळ खोळिया आवैला, गादड़ रंग लगा'र ।।
गादड़ बदळै खोळिया, मन में भूंडी धार ।
खेत रुखाळो भायलां, गादड़ देसी धार ।।
साम्भी नेता डुगडुगी, ढूंढै बांदर तीन ।
बोटां आळै बगत में , खूब जमैला सीन ।।
बण्या मदारी नेतिया, लीला दीवी राच ।
जनता भोळी बांदरी, खूब दिखावै नाच ।।
बोट पड़ैला भायलां , नेता चढग्या घोट ।
टाट बचाओ आपरी, ले सतगुर री ओट ।।
बोटां आळी बगत में, काढां सगळो खोट ।
राज सुंवारै आपणों, झाड़ू जेड़ो बोट ।।

*मत चूको श्रीमान*


भिस्टवाड़ै इण देस नै , कर न्हाख़्यो कमजोर ।
अन्ना भेळै आय परा , काढो काळा चोर ।।
अन्ना आळै अंधड़ में, उडसी डूंगर आज ।
दुनियां सगळी देखसी, भारत रो गणराज ।।
पैसा पैसा कूकतां, नेता बणग्या चोर ।
बिल लोकपाल ल्यांवता, आवै कितरो जोर ।।
आज बगत है आण रो, चालो सगळा साथ । 
भिस्टवाड़ै नै बालस्यां, आज बधाओ हाथ ।।

*पंचलड़ी*

सांची बात खारी लागै ।
कूड़ी बात प्यारी लागै ।1।
साच नै ओ बतावै कूड़ ।
ओ माणस सरकारी लागै।2।
घाल कोठी ठाठ करै अब ।
पूरी खाल उतारी लागै ।3।
जनता रोवै भूखी तिस्सी।
आं नै आ हुंस्यारी लागै ।4।
नेता घरां नेता जामै ।
जनता अब बिचारी लागै ।5।

*सोवां कोनी *

रोवै जका
सोवै कोनीं
सोवै जका
रोवै कोनीं
दुख आळी रात
कद आवै नींद
सुख आळी रात
सोवै कुण !

कुण कैवै
रात सोवण
अर
दिन जागण सारु होवै
भलै मिनखां चितारी
सोवो तो रात है
जागो तो बात है
सूत्यां कटै दिन
जकै में
भेळा होवै दिन-रात !

सूत्यां नै जगावणों पाप है
पाप्यां नै जगावणों महापाप
पण चालो
आपां जगावां सूत्यां नै
बदळां पाप पुन्न रा भेद
मिट्यां भेद आ सी नींद
जकी जगासी जगती नै !

पैली अर अब

पैली
काम सरु करता जद
सगळां सूं पैली
गणेश जी नै सिंवरता
अब 
आंख खोलतां ई
दिनूगै-दिनूगै मसळै 
गणेश छाप जरदो !

सबद ई रड़कै

कांकरी सी रड़कै
काळजै में
कुण या कांईं होसी
भीतर जाय सोधूं तो
स्यात लाधै
उथळीजूं पण किंयां
भीतर जाऊं किंयां !

भीतर सूं
आवै फगत सबद
सांसां रै घाल गळबांथ
बाअंडै रै सबदां सूं
करण बंतळ
अरथावै मनगत
दीठ रै सांकड़ै जगती में
सबद ई है स्यात
म्हारै भीतर-बाअंडै ।

सबद ई रड़कै
काळजै म्हारै
बिगसण
बरतीजण
अरथीजण ने हांफळता !

. भूख

.
भूख हुवै तो
भूखा छोडै कोनीं 
डूंगरां रो भाठो
धाप्योड़ा नै
रोटी खावण में ई
दीखै भोत घाटो 

कूड़ी काया कामणीं

कूड़ा बोलै कूकड़ा, पल्लै कठै परभात ।
सूरज सूत्या सूमड़ा, बणसी ऊग्यां बात ।।
कूड़ा बोलै कागला , आसी प्रीतम आज ।
प्रीत बजै है पांगळी , बणसी किण विद बात।।
कूड़ा म्हारा कंतजी, कूड़ा करग्या कोल । 
बेगा आवण बोलग्या, बदळ्या खुद रा बोल ।।
कूड़ी काया कामणीं , खिल-खिल खेलै खेल ।
साजन सो'वै सांकड़ै , छीजै छूट्यां छेल ।।
कूड़ा काळा केसड़ा, ओपै भरवां अंग ।
काया मांगै काळड़ो, बेगा बदळै रंग ।

राम रुखाळो देस रो, दीखै कोनीं और । 
नेता पाळै बैमड़ो, म्हारै हाथां डोर ।


सोयां चरसी भायला, सुन्ना थारा खेत ।
खांधां धरलै डांगड़ी, गोधां क्यां रो हेत ।।

गुरुवार, 20 जून 2013

कविता

कविता बिलखै आज, जग नीं सुधरै भायला । 
कांई सोच करिया, कागद काळा ओमिया ।।

*चमचा ई भगवान*

चमचा चाटै चासणीं, भर-भर कूंडा रोज ।
नीं हो चमचा आप तो, खुर लाधै ना खोज ।।
चमचा मोटा चौधरी, भोगै पूरा ठाट ।
चमचा नीं हो आप जे, तो फूटैली टाट ।।
चमचा चालै स्यान सूं , करगै ऊंची धूण ।
चमचा नीं हो आप तो, थांरी आंख्यां लूण ।
इण कळजुग में भायला , चमचा ई भगवान ।
खावै पीवै मोकळा , बेजां पावै मान ।।
चमचा पाळै नेतिया , बैठण कुरसी राज ।
कुरसी बैठ्यां नेतिया , बां री मेटै खाज ।।

*रोळगदोळ अड़ंगो *

*
बकरी ब्याई,इंडा ल्याई ।
लाडू बांट्या,ऊद बिलाई।।
नाचण ढूक्या,ऊंदर-चूसा ।
भेड पकड़ी,आय कसाई ।।
चिलखां मिलगै,नाळ काटी।
कीड़ी मांगी,आय बधाई ।।
मार झपट्टो,इंडा फोड़्या ।
बां सूं निकल्या,च्यार सिपाई।।
सिपला बेटा,मांग्या रिपिया।।
पल्लै कोयनीँ,आन्ना पाई ।।
मंत्री उण रो, काको सागी ।।
दाबो बातां,म्हारा भाई ।।

*ठाट सरदी रा *


सरदी लागै सांतरी, खावण आवै ठाट ।
पूड़ी पापड़ पापड़ी, सगळी जावां चाट ।1।
चाट पकोड़ी चटपटी , ताती ताती चाय ।
छोडां नीं म्हे बापजी, झट लेवां गटकाय ।2।
पगेलागणां बाद में , पैली देखां चाय ।
बिना चाय रै भायलां, भेंट न आवै दाय ।3।
मूंफळी चलै जोट में, आखी आखी रात ।
खाणां पीणां नीवड़ै ,घटै न मन री बात ।4।
ताती पीवां चावड़ी, मुंडै निकळै बाफ ।
चाट पकोड़ी देखगै ,नीचै पटकां राफ ।5।

पांच दूहा भिस्टवाड़ै रा

अन्ना बापड़ो ऐकलो , भिस्टड़ा है अणथाग ।
लाम्पो लेय लगाय दे, जनता आं रै आग ।1।
कुरसी बैठ कूड़ कथै, कुरसी छूट्यां सांच ।
कुरसी आं री खोसल्यो, साल न देवो पांच ।2।
करै दलाली निसरमा, जीत परा चुणाव ।
मूंघा बेचै कोयला , जेबां घालै भाव ।3।
राम रुखाळो देस रो, काटै नेता कान ।
जनता बैठी गूंग में, किंयां बचसी स्यान ।4।
सांची मानो बातड़ी,नेता जी रा बोल ।
जनहित में जे जीमग्या, खोलो मत ना पोल ।5।

पंचलड़ी

बिरथा है प्रीत नै जापणों अठै ।
कुण है इण भीड़ में आपणों अठै ।।
मुंडै मीठा अंतस साव खारो ।
दोरो मिनखा जैर मापणों अठै ।।
असली तो कमांवतां लागै बरस । 
नकली भोत सोरा छापणों अठै ।।
जग री पीड़ बळ-बळ बण्या भूंगड़ा ।
हराम देस खातर तापणों अठै ।।
माटी-कोयला-देस तक जीमग्या ।
मुसकल है उणां रो धापणों अठै ।।

संगत (कुचरणीं)

रात नै मौड़ै 
टिल्ला खांवतो बेटो
घरां आयो तो बाप बोल्यो
थूं अजकाळै बिगड़'र
तीन कोडी रो होग्यो
इत्ती ना पीया कर
सुधरज्या
बुरी संगत छोड दे !

बेटो बोल्यो
थे ठीक कैवो बापू जी
ओ बुरी संगत रो ई असर है
म्हे छै भायला अर पांच बीयर
पांच साळा पीवै कोनीं
पांचां री म्हनै ई पीवणीं पड़ै
थांरी खरी-खोटी सुणनीं पड़ै
थे चिंत्या ना करो
आ बुरी संगत छोड देस्यूं
पांच सीसी पचावणियां सूं
नातो जोड़ लेस्यूं !

सरदी

सरदी  घूम्मै ढूंढती , बूढा  बूढा हाड ।
कई नै चिता चाढसी, कीं नै कबरां गाड ।

ठंड पड़ै है जोरगी , गाभा  पैरो साब ।
फैसन फंडा छोडगै, ताती पीवो राब ।।

*बीत्यो है बगत*

तारा टूटै आभै सूं 
आभो पण कदैई
रीत्यो नीं
बीत्यो है बगत
गिणतां-गिणतां तारा
गिणीज्या पण कद
नखत आभै रा सारा !

आपां सूं पैली भी
गिणता होसी लोग तारा
अब कठै है बै सारा
आभो तो आज भी है
अणगिणत तारां सूं
पळपळांवतो लड़ालूम !

*खुद खुदा अर दूजा खोजा*

दूजा खावै तो
घणों लागै
खुद खावै तो
कम लागै !

दूज रो सांच
कूड़ लागै
खुद रो झूठ
सांच लागै !

दूजां रो मान
धूड़ लागै
खुद रो मान
सिरै लागै !

दूजां रो धन
काळो लागै
खुद रो धन
धोळो लागै !

दूजां री बात
फांफ लागै
खुद री बात
दमदार लागै !

दूजां रा सद्‌कर्म
पाप लागै
खुद रा कुकर्म
धर्म लागै !

दूजां री कमाई
दो नम्बर लागै
खुद री कमाई
एक नम्बर लागै !
Related Posts Plugin for WordPress, Blogger...
इस गैज़ेट में एक गड़बड़ी थी.