कुचरण्यां

*कुचरणीँ*
 

-फेसबुक-
 

अदबदी कामणगारी
थोबड़ा पोथी
जकी मेँ बातां
...निग्गर थोड़ी
पण ज्यादा थोथी !
 

-ब्लाग-
 

ईं सदी रो
स्सै सूं मोटो रोग !
 

-ई-मेल-
 

ऐक और
फीमेल
जकी
बणा राख्या है
लोगां नै रेल !

- पै'लो सुख -
 

पै'लो सुख
निरोगी काया
इण बात माथै
...ऐक जाम और भाया !

- लेखक -
 

दळियो दळण आळी मसीन
जकी
दळियो दळ्यां राखै
अब चावै
किणीँ नै भावै या नीँ भावै
उण री से'त माथै
कोई फरक नीँ आवै !
 

- पंखो -
 

करतां ई खटको
पंखो करै लटको 

- रिस्ता -
 

अंगरेज देग्या
दो सबद
अंकल अर अंटी
...जकां बजा दी
सगळै रिस्तां री घंटी ।

- चसमो -
 

लूंठो बेईमान
खाल खावै
नाक री
अर
हाजरी भरै
आंख री ।

- फोन -
 

लूंठो चुगलखोर
जको
इन्नै री बात
बिन्नै करै
अर लोग
इण चुगलखोरी रा
पईसा भरै ।

- सीटी -
 

सीटी सूं
लुगाई झट पट जावै
आ बात
...आज समझ आवै
जद रसोई मेँ जोड़ायत कूकर आगै थम जावै !

- ग़ज़ल -

प्रेमी रै मुंडै सूं
सुण'र ग़ज़ल
प्रेमिका होगी पज़ल
सोचण लागी
ओ मरज्याणोँ तो
आभै मेँ जासी
म्हां सारु
चांद तारा ल्यावण नै
फेर तो
कई बरस लागसी
पाछो आवण मेँ
कांईँ सार है
ओ रिस्तो निभावण मेँ !

कविता

*म्हे कुटीजता*
 

म्हे जद छोटा हा
बात बात माथै
रूस जांवता
मानता तो मानता
...नीँस कुटीज जांवता
कई बार
कुटीज जांवता तो भी
रूस जांवता
मानता ई नीँ
लाख मनायां ई !

ठाकुरजी रै भोग ताईं
आई मिठाई
चोर'र खांवता तो कुटीजता
मांगता तो भी कुटीजता
पत्थर रै भगवान रै
चढ्योड़ी मिठाई
भगवान तो नीँ
हरमेस म्हे ई खांवता
लुक बांट'र
ठाह लाग्यां
नीँ लाग्यां भी
म्हे ई कुटीजता !
पत्थर री देवळी तो
सदां ई इकसार
हांसती रैँ'वती
मा खानीँ अर म्हां खानीँ !

2 सतलड़ी

*सतलड़ी*
 

जाग सकै तो जाग भायला ।
नीँ-स लगा दे आग भायला ।
 

मनड़ै री कथ बेगो बेगो ।
क्यां भी काढै राग भायला ।
 

.उछाळ आज मत माथै राख।
नीचै पड़गी पाग भायला ।
 

थारी पांती खोसण ढूक्या ।
मुंडै अणवा झाग भायला।
 

गोदा घुसग्या आंख्या सांमीं।
क्यूं लुटवावै बाग भायला ।
 

भाषा थारी भूंडै नुगरा ।
कर दे बां रा दाग भायला ।
 

लेय लाम्पो लगावण चालां ।
बूजा है अणथाग भायला।

 

 

-रूंखड़ा-
 

जड़ां छोड्या पिराण रूंखड़ा।
ऊभ्यो किणरै ताण रूंखड़ा।।
 

तूं तिरसायो कळपी धरती। 

 आभै में घमसाण रूंखड़ा ।।
 

छीँयां सटै आज पंछीड़ा ।
भूल्या मीठो गाण रूंखड़ा ।।
 

थारा पान खोय बायरियो ।
रुळग्यो राणोराण रूंखड़ा ।।
 

बरसां थारै बांध राखड़ी ।
बळगी बेलां भाण रूंखड़ा ।।
 

थारी काया मुरधर माया ।
आज रुळै है आण रूंखड़ा ।।
 

काढ़ पानका दे हरयाळो ।
जीयां थारै पाण रूंखड़ा।

ऊंदी कविता

*ऊंदी कविता*
 

हाथी चकगै कीड़ी चाली।
धरती चकगै कूऐ घाली।।
 

मांचो माणस माथै सोवै ।
.आटो फैँकै छाणस पोवै ।।
 

मोटर माथै सड़कां चालै।
नै'रां माथै धरती चालै ।।
 

सुपनां मेँ अब नींदां आवै।
मा नै गोदी पूत रमावै ।।
 

नळको पाणीं नीचै न्हावै ।
फळ धरती रै नीचै आवै ।।
 

रोटी खा गी माणस सारा ।
पाणीँ पीग्या कूआ सारा ।
 

कुलफी खा गी घोचो सारी ।
बातां मिलगै सोचो सारी ।।

नेता अर बाबां रा दूहा

*आप बताओ बापजी*
 

हालत म्हारै देस री, मत ना पूछो आज ।
नेता खावै नोटड़ा, जनता माथै गाज ।।

हाकम होया हरामी,खुल्ली मचावै लूट ।
आप बताओ बापजी,कुणसै दीवी छूट ।।

नेता जी रै हाथ मेँ, भूंडी बेजां चाल ।
जनता रोवै बापड़ी, नेता खावै माल ।।

नेता जी रै आंगणै,चालै है टकसाल ।
बोटां आळी टैम मेँ,बण आवै कंगाल ।।

*बाबा बदनाम*
 

राजा भरतो हाजरी, बाबां आगै जाय ।
अब बाबा रोज मंडै, राजा आगै जाय ।1।
 

राजा करतो चाकरी,बाबां चरणां बैठ ।
.अब तो चाटै पगथळी, बाबां खोई पैठ ।2।
 

राजा सोंतो ओजकै , बाबा लेंता चैन ।
राजा सोवै चैन सूं, बाबा जागै रैन ।3।
 

बाबा तपता मोकळा , धन सूं जाता दूर ।
बाबां रोप्या बिणजड़ा, लाज्या भगवां पूर ।4।
 

बिरम ग्यान नै ध्यांवता ,बाबा हा निसकाम ।
रगां बिराजै कामड़ो, बाबा है बदनाम ।5।

बिरखा रा दूहा

*बिरखा*

बरसो मत नां बादळां ,बरस्यां दुख है भोत ।
साजन सोवै खेत में , म्हानै आवै मौत ।। 

टूटी फूटी झूंपड़ी , चौवै च्यारुं मेर ।
कितसी ढाळूं ढोलियो, बिरखा काढै बैर ।।
 

टप टप टोपा तन पड़ै, पिंडै लागै लाय ।
साजन भंवै आंतरा, बादळ दै सिळगाय ।।
 

गांव बिचाळै टापरी, आंगण साम्हीं पोळ ।
संग नहावै सायबो , बरस्यां बिगड़ै डोळ ।।
 

छम छम बरस्या बादळा, टप टप चौई छात ।
साजन ढाबै छात नै, आंख्या थमगी रात ।।

सावण बरस्या बादळा, साजन आया याद ।
बातां पुरसै फोनड़ै,आसी सावण बाद ।।
 

रेलां बणगी सोतणां , साजन लेगी साथ ।
बिरखा बरसै सांतरी , गौरी मसळै हाथ ।।
 

छाती छोलै छांटड़्यां , मोर चिगावै भोत ।
बिरखा थारै कारणैं, उघड़ै म्हारा पोत ।।
 

मेह उजाळी खेजड़्यां, माटी बदळ्या रंग ।
काया म्हारी पांगरै, साजन होयां संग ।।
 

धरती भीजी मेह में , हरिया काढ्या पान ।
म्हैँ भी भीजी मेह मेँ, म्हारी बिगड़ी तान ।।

सावण रा दूहा

*सावण जावै हाथ सूं*

सावण सुंरगो आवियो, आया नीँ भरतार ।
काया म्हारी दाझगै,कांईं चावै करतार ।।
 

आभै चमकी बीजळी, धरती बधगी आस |

कळपै थारी कामणीँ, साजन आओ पास ।।
 

सावण बैरी सायबा, नित रो बरसै आय ।
घरां पधारो सायबा, जोबन बैरी खाय ।।
 

हिंडो मांडूं हेत सूं , गाऊं गीत पच्चास ।
सायब होवै साथ मेँ, हिंडो चढै अकास ।।
 

फोन लगाऊं सायबां, आवै कोनीँ टोन ।
सावण जावै हाथ सूं , ओन करो नीँ फोन ।।

सावण आयो सायबा, मत ना जाओ दूर ।
सेजां पोढो आयनै, छोडो सगळा टूर ।।
 

तनड़ो सारो भीजग्यो, मनड़ो गावै गीत ।
साजन भेळा नाचल्यो , बणगै मन रा मीत ।।

अंबर गाजै बादळी, मनड़ै नाचै मोर ।
साजन म्हारा आंतरा ,रत्ती न चालै जोर ।।
 

आभै देखूं बादळा , हिवड़ै उपजै नेह ।
साजन होवै साथ मेँ , भळ बरसो थे मेह ।।
 

चंदै लिपटी बादळी , आभै देखूं भाज ।
घरां पधारो सायबा , काया छोडूं आज ।।