*सतलड़ी*
जाग सकै तो जाग भायला ।
नीँ-स लगा दे आग भायला ।
मनड़ै री कथ बेगो बेगो ।
क्यां भी काढै राग भायला ।
.उछाळ आज मत माथै राख।
नीचै पड़गी पाग भायला ।
थारी पांती खोसण ढूक्या ।
मुंडै अणवा झाग भायला।
गोदा घुसग्या आंख्या सांमीं।
क्यूं लुटवावै बाग भायला ।
भाषा थारी भूंडै नुगरा ।
कर दे बां रा दाग भायला ।
लेय लाम्पो लगावण चालां ।
बूजा है अणथाग भायला।
-रूंखड़ा-
जड़ां छोड्या पिराण रूंखड़ा।
ऊभ्यो किणरै ताण रूंखड़ा।।
तूं तिरसायो कळपी धरती।
आभै में घमसाण रूंखड़ा ।।
छीँयां सटै आज पंछीड़ा ।
भूल्या मीठो गाण रूंखड़ा ।।
थारा पान खोय बायरियो ।
रुळग्यो राणोराण रूंखड़ा ।।
बरसां थारै बांध राखड़ी ।
बळगी बेलां भाण रूंखड़ा ।।
थारी काया मुरधर माया ।
आज रुळै है आण रूंखड़ा ।।
काढ़ पानका दे हरयाळो ।
जीयां थारै पाण रूंखड़ा।
कोई टिप्पणी नहीं:
एक टिप्पणी भेजें