लूआं चाली कोझकी,
लूआं चाली कोझकी, मुरधर तपियो ताप ।
बिरखा करदे बादळी, नीँस लागसी पाप ।1।
लूआं मारी लूंकड़ी , हिरण तिसाया धाप ।
गांव उंचाळो घालियो , मुरधर घर संताप ।2।
लूआं लूंटी जूणती, मुरधर लागी लाय ।
बादळ थारी आसड़ी , बरसै क्यूं नीँ आय ।3।
तपै अकासां तावड़ो , मुरधर सिकती जाय ।
बादळ थारी आस मेँ , धोरी मरतो जाय ।4।
छांटा कर दे बावळा , कर दे थारो काम ।
धोरी खूब उजाळसी , बादळ थारो नाम ।5।
चीड़ी छोडै आळणोँ , मरै भच्चीड़ा खाय ।
पाणी लागै हाथ नीँ , जूण चक्कर मिट जाय ।6।
देख तिसायो मानखो , सुण बादळ समचार ।
बिरखा कर दे सांतरी , कर नीँ थोड़ो विचार ।7।
सांडो मरग्यो सूकगै , सुगन पाळतो धाप ।
लूआं बिलां ढूकगी , बादळ लुकिया आप ।8।
ताळ तळायां निरजळा, कूआं ऊंडी धार ।
बादळ बेगो आयज्या , लूआं देसी मार ।9।
तपतो तन मन तड़फड़ै, लूआं लियो लपेट ।
रो'ई ज सुन्नी सूकगी , डांगर खाली पेट ।10।
मोह पांगरै मेह मेँ, तज आवै परदेस ।
बादळ बीरा बरसज्या, प्रीतम आवै देस ।11।
कोई टिप्पणी नहीं:
एक टिप्पणी भेजें