चाळीस कुचरणीं

नेता चाळिसो

चाळीस कुचरणीं

१.

सो गावां री

बाजरी खाई

साठ गांवां रो लूण

नेता जी घूमै

ज्यूं कूवै रो भूण !

२.

घर में आठ रा

बा’रनै साठ रा

नेता जी बणग्या बाप

राम जाणै बां नै

कद लागसी पाप !

३.

पोतडिया
थाणै में सूकै
नेताजी
मंचां माथै भासण देवै
जाणै दूध सारू
टाबरियो कूकै !
४.
नेताजी देवै
भासण साफ़
ढीली पड्गी
भलांई राफ़ !
५.
नेताजी रो
कुण सग्गो
जको बणै
बो खावै
सै सूं पै’ली
तगडो दग्गो !
६.
नेताजी रा
च्यार भाई
स्टोरिया
ब्लैकिया
स्मगलर
अर सिपाई !
७.
नेताजी करावै
सगळां सूं चाकरी
दिल्ली जाय’र
चिन्ता कोनी करै
कीं री ई डाक री !
८.
नेताजी खस्सै
भासण नैं
जनता तरसै
रासण नैं !
९.
नेताजी री
जनता में
नीं गळै दाळ
संसद में जाय"र
काढै
भूंडी गाळ !
१०.
नेताजी
कीं नै ई
नीं जाण देवै
बोटां सारु
भैंस नैं ई
ब्याण देवै !
११.
नेताजी
कीं री पूरी
मांग करै
बै तो खुद आपरी
भोत दोरी
उंची टांग करै !
१२.
नेताजी में
सिफ़तां मोकळी
ताबै आयां
बगतै नैं ई
दे ज्यावै ढोकळी !
१३.
नेताजी राखै
एक चेलो
जको
भरतो रै’वै
नोटां सूं थैलो !
१४.
नेताजी
हारतां ई
बण जावै गंद
पांच साल ताईं
करावै बजार बंद !
१५.
नेताजी रो
ओ एलान
नोटां री माळा
म्हारै गळै
दूर राखो भान !
१६.
नेताजी जद
हांसै कूडी हांसी
समझल्यो
चढसी कोई फ़ांसी !
१७.
नेताजी नैं
चौखा लागै
गांव में सरपंच
अर
सै’र में मंच !
१८.
नेताजी नैं
भावै
बोटर भोळो
अर
संसद में रोळो !
१९.
नेताजी
घणा भोळा
बोलै ई कोनीं
भलांई
कित्ता’ई देवो
नोटां रा झोळा !
२०.
नेताजी
आलाकमान सूं
टिगट मांगै
जे गाडी में
टी.टी. टिगट मांगै
तो बै बीं नैं
चालती गाडी में
फ़ांसी टांगै !
२१.
नेताजी डरै
खाली हारण सूं
बाकी तो बै
कद डरै
सागी मा नै भी
मारण सूं !
२२.
नेताजी रा
दाळ-भात
दळ बदळ
अर
पीठघात !
२३.
नेताजी
कर सकै
बलात्कार
जे बां नैं नीं हुवै
बोटां री दरकार !
२४.
नेताजी बोल्या
परनै हू ए गावडी
कीं म्हांनै ई
चरण दे डावडी !
२५.
नेताजी रै
छप्पन रोग
जीत्यां ई
हुवै निरोग
के जाणै बापडा
भोळा लोग !
२६.
नेताजी
कद बणै मोडा
जे बण जावै
तो फ़ोड न्हाखै
देवतावां रा गोडा !
२७.
नेताजी बोल्या
जनता री तकलीफ़ां
दूर करण रो
म्हैं ले लियो ठेको
अब तो म्हांनै
बोटडा टेको !
२८.
नेताजी बोल्या
जे म्हे नीं हुआं
कुण थूकै
कुण चाटै
अर म्हारै बिनां
एक ई पुळ रै
उदघाटण रो फ़ीतौ
बार-बार कुण काटै !
२९.
नेताजी रै
एक ई कळेस
पार्टी तौ बदळ सकै
कीयां बदळै भेस !
३०.
नेताजी
अर अडवै में
इत्तौ ई फ़रक
अडवौ कीं खावै कोनीं
अर नेताजी खांवता
सरमावै कोनीं !
३१.
नेताजी रै
सो कीं पचै
अर
बांरै खायां पछै
कीं नीं बचै !
३२.
नेताजी
देश नैं खा सकै
पण
धोखौ नीं खा सकै !
३३.
नेताजी
सो बार पार्टी बदळै
पण बां रो मन
एक बार भी
नीं बदळै !
३४.
नेताजी रै
सासण में
डीपू आळै
रासण में
खोट ई खोट
सतगुरु तेरी ओट !
३५.
नेताजी
एक दम बेकार
पण चढण नै
चाईजै कार !
३६.
नेताजी रो
दाव
राज रो
न्याव !
३७.
नेताजी रा
कान काच्चा
कद रै’वै
याद वाच्चा !
३८.
नेताजी
रोटी खोसै
पण मांगै बोट
डाकू नै पौखै
धरमी नैं रोसै !
३९.
नेताजी रै
सात दूणी आठ
अर जनता रै
बीस चौका आठ !
४०.
नेताजी
पाळै धरम
पण
धरम माथै चालता
राखै सरम !