कागद राजस्थानी

शुक्रवार, 15 जून 2012

आभै रा पांच चितराम

आभै रा पांच चितराम
==============

1.
आभो
मरै मिजळो
खुद नीं बरसावै
मिनखां रो देखै
अंतस थिर पाणीं !
2.
आभो
कुंड अगन रो
पाळै सुरजड़ो
जको खदबदावै
बिना पाणीं
रेत में हांफळता
मगसा मिनख !
3.
आभो खिंडावै
अखूट सुनियाड़
रमावै उण में
चांद-सूरज-तारा
मिल पर ऐ
अधावै मिनख नै
लगोलग सारा !
4.
आभो साम्भै
काळ रा परवाना
बो ई टोरै
मुरधर माथै
जूण रो नास
जूण री आस
बिरखा नै
टोर टाळ !
5.
आभो
घर बादळ रो
सासरो बिरखा रो
बिरखा बीनणीं
आवै कियां
साव परबारी
मुरधर पीवरियै
बिनां भेज्यां ?

सगत रै हाथ बगत

सगत रै हाथ बगत
============

समूळी सगती
म्हारी आंख्यां साम्हीं
सांवट'र चढ बैठ्यो
म्हारी छाती
हाथां दिया घमीड़
जीमतै री थाळी खोस
खायग्या म्हारी पांती
बरज्यो बकारयो तो
हाका करया
म्हारी बुसक्यां देख
परचावण ढूक्या ;
आ बगत री मार है
समो भोत बळवान
इण रै आगै
बिसात कांईं मिनख री ?

म्हैं मनां सोचूं
उथळूं घट में
सिरकै क्यूं नीं
जे सिरकै नीं तो
सगत रै हाथ
क्यूं है बगत ?

रेल अर रेत

रेल अर रेत
========

बीकानेर सूं गाडी चाली
नैरां खानीं न्हाठी चाली
धोरां मांखर भाजी चाली
रेत उठी अर लारै चाली
लूमी रेत चौफेर गाडी रै
काढी गाळां देय गाडी रै
कुण नै लेयगी
कुण नै लेयगी
कुण नै लेयगी
कुण नै लेयगी
थमज्या-थमज्या-थमज्या
थमज्या-थमज्या-थमज्या
छोड दे-छोड दे-छोड दे
छोड दे-छोड दे-छोड दे

डांखळो

डांखळो
--------

सगळी बातां रो जाणकार मानतो खुद नै कवि दादो ।
बातां रो मतलब बतावण रो करया करतो खुलो वादो ।
                         पड़ती   जद पार नीं
                       मान्या करतो हार नीं
रीसां बळतो कर दिया करतो भच्च देणीं बात रो कादो ।।

बुधवार, 6 जून 2012

मेह होवै तो म्हे होवां

 मेह होवै तो म्हे होवां
तपती चालै
बळबळती बगै
बादळां नै झूरती
आभो धरती
एक करती पून !

झूंपड़ा तपावंती

गाछ सुकावंती
पाणीं बाळती
लू बणी बगै पून
बादळां रो सोधती
अंतस पाणीं !

लूआं रो

फंफेडीज्योड़ो धोरी
आभो तकै
करै अरदास
मेह करो
मेह होवै तो

म्हे होवां !

शुक्रवार, 1 जून 2012

कुचरणीं

छेद अर भेद
========

साची कै'ग्यो बाबो
छेद अर भेद ढाबो
छेद अर भेद
कदै ई
नीं खोलणां
जे ऐ खुल जावै
तो सो कीं ढुळ जावै !

कुचरणीं

कुचरणीं
=====

छोरै खातर
छोरी देखण गया
बाबो अर माऊ
छोरी आळा
छोरी दिखाय'र बोल्या
छोरी घणीं स्याणी है
बेजां चतर है
काचर नै काट्यां बिन्यां
काचर रा बीज गिणलै !

माऊ बाबो बोल्या
बस बस आ ई चाईजै
छोरी के है
एक चीज है
म्हानैं तो इस्सी ई चाईजै
क्यूं कै छोरो म्हारो
काचर रो बीज है !
कुचरणीं
=====

छोरै खातर
छोरी देखण गया
बाबो अर माऊ
छोरी आळा
छोरी दिखाय'र बोल्या
छोरी घणीं स्याणी है
बेजां चतर है
काचर नै काट्यां बिन्यां
काचर रा बीज गिणलै !

माऊ बाबो बोल्या
बस बस आ ई चाईजै
छोरी के है
एक चीज है
म्हानैं तो इस्सी ई चाईजै
क्यूं कै छोरो म्हारो
काचर रो बीज है !

जोनियो जाडू

जोनियो जाडू
========

म्हारो दिल टूटग्यो
दादी सूं बोल्यो
जोनियो जाडू
दादी बोली-
कोई बात नीं मला
च्यार दिनां में देखी
आपी जुड़ जासी
नित खाया कर
गूंद रा लाडू !

दूहा-गुट रा गुटका

गुट रा गुटका
========

गुट रा गुटका सांतरा , मीठ लागै भोत ।
गुट सूं बारै जांवतां , साम्हीं दीखै मौत ।1।
गुटज बणाओ भायलां , गुट में बेजां मौज ।
निरगुटियां रा आपनै , खुर लाधै ना खोज ।2।
गुट में रांधी खीचड़ी, गुट में लीवी खाय ।
गुट बारै री लापसी, आवै कोनीं दाय ।3।
गुट रो तूंबो सेव है , निरगुट आम्बो आक ।
गुट रा ढकल्यो ऐबला , निरगुट काटो नाक ।4।
गुट रो लेखक सांतरो , मांडो चावै गाळ ।
निरगुट मांडै टाळवीं ,उण नै देवो टाळ ।5।
गुट री काढां चौपड़ी , गुट नै देवां  छाप।
                                                    निरगुट आळा छापगै ,क्यूं कमावां पाप ।6।
गुट आळा ई तारसी, जास्यां सागर पार ।
पासपोर्टड़ा त्यार है ,आदेसां इंतजार । 7।
 धन रो मोटो फायदो , दिल नै देवै जोड़ ।
बिना फायदै भायला , यारी देवै छोड़ ।8।

मतलब पेटै भायला , मतलब छोडै यार ।
मतलब री माया चलै , मतलब निकळ्यां पार ।9।

गुटबंदी में मौज है , गुटबंदी भगवान ।
गुट रै साथै चालगै , काम चढै परवान ।10।

निरगुटिया तो ऊतिया , डोफ्फा गूंगा सांड ।
निरगुट चाबै आकड़ा , गुट में बंटै खांड ।11।
Related Posts Plugin for WordPress, Blogger...
इस गैज़ेट में एक गड़बड़ी थी.