कागद राजस्थानी

शुक्रवार, 9 अगस्त 2013

. *म्हे अर बै*

.
[1]
म्हे तो
बरसां खाई कोनीं
धाप'र रोटी
अर बै खाग्या
म्हारी बोटी-बोटी !
[2]
म्हे
घालता रैया बोट
अर
बै छापता रैया नोट
म्हारै पल्लै आज
साल दर साल है
बोट ई बोट
अर बांरै पल्लै
अकरा अकरा नोट !

*साथै जासी प्रीत*

मद में चालै लोगड़ा , क्या ग्यानी क्या सूर ।
आब गमावै आपरी , थकां फूटरा पूर ।।
ग्यान हांडकी आपरी , ढकगै राखो आप ।
छलकत लछकत खूटसी , बणसी भूंडी छाप ।।
ग्यान कमायो आप जे, बांटो जग में जाय ।
खुद कमावै खुद खावै , बै डांगर कहवाय ।।
जग सूं पाछा जांवता, साथै जासी प्रीत ।
प्रीत बांटता जायस्यो , जग गावैला गीत ।।
हेत कमाई आपरी , बाकी कूड़ा काम ।
कूड़ करम नै छोडगै, खूब कमाओ दाम ।।
भाषा बोलै आपरी , जग में जीया जंत ।
भाषा छोडै आपरी , उण रो नेड़ो अंत ।।
मायड़ भाषा बोलतां , सीखो भाषा और ।
खुद री भाषा छोडगै, पाप करोला घोर ।।

म्हांरै मुंडै पाटो

म्हारै खांनीं सूं
इज्जत देवण में
कोई कसर कोनीं
बां रै खांनीं सूं
इज्जत लेवण में
कोई कसर कोनीं
म्हारै तो
दोरा-सोरा टळै टंक
बां रै खन्नै
डांगरां नै चरावण सारु
टणां आटो है
फेर भी बै कैवै
म्हारै घाटो है
बै गाळ काढता
जाबक नीं संकै
म्हांरै मुंडै
बरसां सूं पाटो है !

*मूंघीवाङै रा दूहा*

सुविधा बधगी मोकळी, खरचा भी अणथाग ।
कुटुम्ब पाळतां बापजी, मुंडै आग्या झाग।।
कांदा आलू रूसग्या , गया रसोई छोड ।
दाळां दळगी मानखो, खावां कांईं भोड ।।
लाल टमाटर प्याजिया, चढ्या अकासां जाय ।
टैम टपावां बापजी , चटणी रोटी खाय ।।
तिनखा ओछी बापजी, जिंसा मूंघी धाप ।
टंकज टाळां टसकता, परमेसर नै जाप ।।
मत ना आओ पावणां ,पगां लगाओ ब्रेक ।
मूंघीवाडो मारसी , थे तो राखो टेक ।।

* तीन कुचरणीँ *


- रिस्ता -
अंगरेज देग्या
दो सबद
अंकल अर अंटी
जकां बजा दी
सगळै रिस्तां री घंटी ।

- चसमो -
लूंठो बेईमान
खाल खावै
नाक री
अर
हाजरी भरै
आंख री ।

- फोन -
लूंठो चुगलखोर
जको
इन्नै री बात
बिन्नै करै
अर लोग
इण चुगलखोरी रा
पईसा भरै ।

*आप बताओ बापजी*


हालत म्हारै देस री, मत ना पूछो आज ।
नेता खावै नोटड़ा, जनता माथै गाज ।।
हाकम होया हरामी,खुल्ली मचावै लूट ।
आप बताओ बापजी,कुणसै दीवी छूट ।।
नेता जी रै हाथ मेँ, भूंडी बेजां चाल ।
जनता रोवै बापड़ी, नेता खावै माल ।।
नेता जी रै आंगणै,चालै है टकसाल ।
बोटां आळी टैम मेँ,बण आवै कंगाल ।।

*बम बम कुदेव*



देस मेँ अब
देवां रो नीं
कुदेवां रो बास्सो है
अब हर हर री जाग्यां
डर डर उच्चारिजै ।
दिल्ली भी अब
बिल्लीबारी होयगी
इणीज कारण
चौगड़दै ऊंदरा थड़ी करै
बै तो अब
दरबार ताणीँ ढूकग्या
अर दरबारी
इणी डर मेँ सूकग्या !
नेतावां रा गाभा
धोळा ई हा
अब तो डील भी
धोळा होग्या
पै'ली सुणता कोनी हा
पण अब बोळा होग्या !

*गई दियाळी*


गई दियाळी
आग्या बै ई सागी दिन
भूख सूं भच्चीड़ा आळा !

नत्थू धोकी दियाळी
बपराई मिठाई
बजाया पटाका टाबरां
लिछमी जी री फोटू
पूजा री सामगरी
फोटू सारु परसाद
ईं सगळै जुगाड़ सारु
सेठ जी सूं उधारी
लारली उधारी चुकावण
बैंक रो करजो !

तळपट मिलावंता
रात निकळगी
आग्यो अन्नकूट
घर मेँ
अन्न होवै तो कूटै
गरीबी गोरधन होयगी
पूजी छेकड़
रात भळै ढळगी
साम्ही दिखै भईया दूज


बाई आसी
बाई री धोती
भाणियां रा झबला
कठै सूं आसी ?

गई दियाळी
छोड़गी कळझळ
बळ ना नत्थू
थम अभी
होळी भी आसी !

*चिड़ी बोली*



चिड़ी बोली
कागलै सूं
नीचै उतर
डागळै सूं
चाल चालां रूंख पर
रूंख ई है आपणों घर है
ओ है माणस रो घर
मैं ईं रै भीतर
भोत रैयोड़ी हूं
ओ क्यां रो घर है
ईं रै भीतर तो
डर ई डर है !

*डांखळो*


सरदी मरतै ऊंदरै दारू ली गटकाय ।
घर में बणाई रोटी कोनीं आई दाय ।
           ऊंदरी नै काढी गाळ
          साग तो ढंग रो बाळ
रीसां बळती ऊंदरी सिर में दी मुंधाय ।।

सरदी में गुळराबड़ी


============
सरदी आयगी । रठ्ठ पड़णों सरु होग्यो । 

अब हाड धूजसी अर नाक करसी सुरड़-सुरड़ ! 
घरां ढूकसी विक्स-बाम रा भांडिया अर सूंघणीं ।
खावण पीवण रा मजा पण इण इज मौसम में ई आवै । 


सीरो, लुपरियो , गुळराबड़ी , पकौड़ा , पूड़ी , परोंठा , 
गूंद-दाळ-मेथी-चासकू अर कमरकस रा लाडू गूदड़ां में 
ई गटकाईजसी । यानी रंधीण अर जमावणों खूब 
गटकाईजसी ।
आं सगळां में पण गुळराबड़ी सरदी सूं बचावण री लूंठी 

ओखद होवै । धांसी , जुखाम अर सरदी री आ रामबाण
 ओखद है । सुबै-स्याम ताती ताती गुळराबड़ी रा सबड़का 
लेईजै तो खुद सरदी मिनख सूं अळगी खड़ी होय धूजै ।
गुळ राबड़ी गुड़ री बणै । आज आप भी बणाओ देखाण-
बणावण रो तरीको
-00000000000
गुड़ नै जुरत मुजब पाणीं में भिजो देओ । उण पाणीं में 

कणक रो आटो घोळल्यो । किलो पाणीं में पाव आटै रै
 हिसाब सूं ।
टोपियै में देसी घी भावै अर पचै जित्तो घाल'र कळकळाओ ।

 कळकळतै घी में काळी मिरच अर सूंफ सेको । इण में 
गुड़-पाणीं रो घोळ छमको । सांगोपांग बड़का आयां पछै 
ऊपर सूं पीस्योड़ी इळायची बुरकाओ । ल्यो बणगी गुळराबड़ी । 
अब पीवो कप-बाटक्यां में घाल घाल । लेवो सबड़का ! 
आणंद ई आणंद आयसी !

*अकरा दूहा*

तोल परा अकडोडिया, बैचै बैठ दुकान ।
आम बतावै आकड़ा, है नीं चतुर सुजान ।।
पाटै काटै रातड़ी, मैडम खींचै कान ।
जीमण ढूकै सायबो . है नीं चतुर सुजान ।।
खबरां राखै जगत री, घर रो कोनीं ध्यान ।
घर में जावै रात नै, है नीं चतुर सुजान ।।
घट घट री बातां घड़ै, घड़ घड़ फाड़ै थान ।
खुद री ढाबै बातड़ी, है नीं चतुर सुजान ।।
मीठो भावै मोकळो , खारो लागै धान ।
फाको मारै खांड रो , है नीं चतुर सुजान ।।

*सैकै सगळा रोट*


नेता जनता एकसा , भावै सब नै नोट ।
पड़ो दरड़ में देसड़ो, सैकै सगळा रोट ।।
जनता घालै कोड सूं , नेता मांगै बोट ।
नेता चाटै थूकगै , जनता भूलै खोट ।।
जात जूत अर नोटड़ा , चालै बोटां लार ।


आं बातां रै कारणैं , जनता खावै मार ।।
नेता मोटो बो बजै , जिण री पूरी धाक ।
भासण देवै धपटवां , काटै सब री नाक ।।
पांच साल तो नींद में, सोवै जा दरबार ।
बोटां आळी टैम में , जागै बा सरकार ।।
कारां जीपां काफला , दारू नोट शराब ।
इतना जिण रै हाथ में, बो जीतैलो साब ।।
स्याणो सूधो है जको , बो तो जावै हार ।
आंख्या न्हाखै रेतड़ी, उण री नैया पार ।।

*काळजां खूटगी आग*


हिंयैं में च्यानणों
होवै कठै सूं
काळजां खूटगी आग
आग होयां ई
लगाईजै लाम्पो
लाम्पो लगायां ई पिंघळै
भेजां ढूकती बरफ
जकी जमाय न्हाख्या
चेतना अर मिनखपणों !

उणां रा बडा भाग है
जिणां रै काळजां
साम्भ्योडी आग है !

मूघीवाडै़ रा दूहा

आटो कमती दाम में, बांटो हो सरकार ।
कठूं लगावण बापरै, ओ भी सोचो यार ।।
लूण मिरच अर लाकडी, मांगै मोटा दाम ।
तेल घिरत अर प्याजिया ,धोकण जोगा नाम ।।

तीन हाइकुडा


1.
प्रीत उकळी
फिड़कलै दी नाड़
दीयै री लाट !
2.
प्रीत रो ढब्बू
फुलायो अणथाग
फूट्यो फट्टाक !
3.
प्रीत रा प्याला
भर-भर पींवता
छेकड़ टूट्या !

राजस्थानी कविता


मायड़ भाषा,


. *चित्तारा*






दोन्यूं आंख्यां में
धोबा धोबा काजळ सारै
पड़तख नै नीं चित्तारै
बजै पण चित्तारा
देखै मनभांवता उणायारा
अंतस री मिजळी आंख्यां
स्यात आं आंख्यां रो काजळ
अंतस री आंख्या ढूक
बिछायली कळमस री
हीणी-मिजळी जाजम !

चांदी वरणों सांच
देखसी कुण भळै
कठै सूं आयसी
कोरी सजळ आंख्यां !

*भायला दिवस*


जमानो तो भाया
भोत भूंडो आयग्यो
कदै ई आया करता
मर्‌योडां रा दिन
अजकाळै तो सांपड़तै ई
जींवता रा दिन आवै
इणी पेटै आज
भायला दिवस बतावै !

आवै जद
दादै-दादी रो
नानै-नानी रो दिन
तो कागलां नै घालां
डागळै कागोळ
अब बताओ
जींवता भायलां नै
कागोळ किंयां घालां
अंगरेजडा घालता होसी
म्हे तो कोनीं घालां
थे घलाओ कागोळ
म्हे तो चालां !

*बिरखा रा दूहा*

तपती बळती मरुधरा , बादळ मांडी आस ।
भोत पळकतो सुरजडो , आज लुक्यो आकास ।।
झळती लूआं झेलता , होया रूंख हतास ।
बादळ मंड्या मुरधरा , जीवण बंधी आस ।।
सरवर तरवर सूकिया , पाणीं गयो पताळ ।
बादळ रै डर भाजियो ,पड़तख दिखतो काळ ।।
पाणी खूट्यो मरुधरा , बच्यो न आंख्या टाळ ।
अंबर बादळ गरजिया , मिटग्या सब जंजाळ ।।
 झूम झमाझम बरसिया, बादळ म्हारै गांव ।
अबकै होसी बाजरी , आई म्हारी डांव ।।
बादळ बरसै धपटवां, किरसां गावै गीत ।
बरसै जद तूं बादळी, लागै मन री मीत ।।
नाड़ उठाई रूंखडां, पड़तां पैली छांट ।



बेलां चढ़गी रूंखडां , छोड छाडगै आंट ।।
धोरां आळी रेतडी , हरखी बेजां आज ।
धानी पैरूं चूंदडी, तूठ्या बादळ राज ।।
हरखी बेजां धण घणीं, पड़ती बिरखा आज ।
अब आवैला पीवजी, नीं चूकैला राज ।।
हींडा मंडै रूंखडां , खेतां चालै गोठ ।
सावण बरसी बादळी, कात्यां होसी मोठ ।।
टाबर जीमै गुलगला, बूढां हथ गुड़राब ।
बायां तळै पकोडिया, मरवण उडीकै साब ।।

*उण रा मारो बीस*

पाक पिद्दी सो कूकरो, काढै नित री आंख ।
लूंठै म्हारै देस री, कतर फैंकदी पांख ।।
मिजळा बैठ्या मौज में, कुरसी ढूंगा टेक ।
फौजी मारै पाकडो, बोलै कोनी ऐक ।।
फौजी मा रा पूत है , नीं माटी री लोथ ।
कांच काढल्यो पाक री, क्यूं बो समझै थोथ ।।
पांच मारिया पाकडै , उण रा मारो बीस ।
बोलै पूरो देसडो, काढो इण विद रीस ।।
सबक सिखाओ पाक नै , आ जनता री मांग ।
आवै नीं बो सांकडै , तोडो उण री टांग ।।
 मंत्री बोलै आज तो, गैर मुलक रै भीड़ ।
राजा होंता आज तो, घाणी देता पीड़ ॥

* सावण रा दूहा*


  


 




सावण बरस्या बादळा, मुरधर बदळ्या तोर ।
गोर्‌यां गावै गीतडा , घालै घूमर जोर ।।
जिण रा पिवजी सांकडै़, उण रा जाग्या भाग ।
जिण रा पिवजी आंतरा, उण रै मनडै़ आग ।।
घर आओ नीं सायबां , बादळ बरस्या भोत ।
थांरै आयां मौल है , बिन आयां है मौत ।।
धरती अंबर जोट है , दोन्यूं एकम ऐक ।
आओ अब तो राखल्यो, गठजोडै़ री टेक ।।
घणों कमायो सायबां , अब छोडो परदेस ।

 बादळ बरस्या मोकळा, जोबण देखो ऐस ।।
काया बळगी जेठ में, चाली लूंआं भोत ।
सावण बरस्यो ऐसकै, मिटगी सगळी छोत ।।
आ काया तो दाझणीं, बिन्यां सांकडै़ कंत ।
थे आवो जी सायबां , नीं तो नैडो़ अंत ।।

सावण बैठी सासरै , बरत करै है बैन ।
बीर बुलावै बादळां, समझो उण रा सैन ।।
सावण बरसो बादळां , कात्ती निपजै धान ।
जाय करां कात्तीसरो, पीरो म्हारी स्यान ।।
 सावण बरस्यो मेवडो, मुरधर हरख अपार ।
हींडा मांड्या रूंखडां , हिंडण ढूकी नार ।।

रविवार, 21 जुलाई 2013

राजस्थानी नारा


राजस्थानी नारा


राजस्थानी नारा


राजस्थानी नारा


राजस्थानी नारा


राजस्थानी नारा


शुक्रवार, 21 जून 2013

* -भाषा खातर-- सतलड़ी*

अणबोल्या अब मरां कोनीँ ।
डरावणियां सूं डरां कोनीं ।
ले गै रैस्यां मात भाषा ।
पग तो पाछा करां कोनी ।।
भाषा खातर दिल्ली जास्यां। 

खाली हाथां फुरां कोनीं ।।
झांसा देय टोरया म्हांनै ।
अब टोरो तो टुरां कोनीं ।।
भाषा अब देवणी पड़सी ।
सुक्कै झांसां पसरां कोनीँ ।।
भाषा आळी टाळो मांग ।
म्हे कोई मसखरा कोनीँ ।।
म्हारै पचै म्हारी भाषा ।
दूजी भाषा जरां कोनीँ ।।

दूहा

काज करण नै थरपियो, जनता खुद रो राज ।
लाज सरम तज नेतिया ,ढूक्या करण अकाज ।।

OOO ओ म्हारो गांव है OOO

ओज्यूं पींपळ री छांव है
मघली-जगली नांव है
बूक हथाळ्यां ठांव है
हां जी, ओ म्हारो गांव है !

जद दिन बिसूंजै
जगै दीया
चांद रै चानणै
टींगर खेलै दडी़ गेडिया ।
बिजळी रै खम्बां
भैंस बंधै
तारां री बणै तण्यां
बिजळी रो खाली नांव है
हां जी, ओ म्हारो गांव है !

करसां बोवै
साऊ खावै
बापू रै नारां रो
गांव में खाली नांव है
बिजळी कड़कै
ठंड पडै़
करसां खसै खेत में
खातां में ज़मींदार रो नांव है
हां जी, ओ म्हारो गांव है !

अंगूठां री नीं सूकी स्याई
मघली जाई
जगली परणाई
मा गैणां रख रिपिया ल्याई
साऊकार री बै’यां में
म्हारी सगळी पीढी रो नांव है
गांव सगळो पड्यो अडाणै
बैंकां रो खाली नांव है
हां जी, ओ म्हारो गांव है !


क-मानै करज़ो
ख-खेतां खसणो
ग=गरीबी
घ-घरहीण
इस्सी बरखडी़
गांव री चौपाळ है
पांच सूं पच्चीस रा टींगर
खेतां-रो’यां चरावै लरडी़
माठर फ़िरै सै’र में
गांव में स्कूल रो खाली नांव है
हां जी, ओ म्हारो गांव है !

अणखावणां-अणभावणां
बणै नेता बोटां रै ताण
ठग ठाकर है म्हारा
गेडी रै ताण
अडाणै री कहाणी कै 
खेत दबाणै री बाणी दै
घेंटी मोस बोट नखावै
जीत परा फ़ेर ढोल बजावै
लोकराज रो खाली नांव है
हां जी, ओ म्हारो गांव है !

अंटी ढील्ली
खेत पाधरो
अंटी काठी
खेत धोरां पर
अळगो-आंतरो
मंतरी री सुपारसां
खेत मिलै सांतरो
खेत-खतोन्यां
हक-हकूतां
ज़मींदार रै हाथ में
गांव बापडो़ फ़िरै गूंग में
चारूं कूंटां पटवारी रो दांव है
हां जी, ओ म्हारो गांव है !
                   

भाषा बोलो आपरी

राजस्थानी हो ?
हो तो- 
राजस्थानी पढो !
राजस्थानी लिखो !
राजस्थानी दिखो !
ना आवै तो
राजस्थानी सीखो !
राजस्थानी बोलो !
संको क्यूं ?
आ आपणीं मायड़ भाषा है !


*
भाषा बोलो आपरी, छोडो मन री लाज ।
चालो चालां मांगबां ,खोस्यां बैठ्यो राज


*तंत*


धोळा काळा कर लिया,जवान होग्या कंत ।
गोडा ओज्यूं बूढिया , कोनीं आयो तंत ।। 
गोडा मांगै गेडियो, ऐनक मांगै आंख ।
लाल गाभा देखगै, डोकर काढै पांख ।।

=========================

*सावण*

सावण आयो सायबा, मत ना जाओ दूर ।
सेजां पोढो आयनै, छोडो सगळा टूर ।।
तनड़ो सारो भीजग्यो, मनड़ो गावै गीत ।
साजन भेळा नाचल्यो , बणगै मन रा मीत ।।
अंबर गाजै बादळी, मनड़ै नाचै मोर ।
साजन म्हारा आंतरा ,रत्ती न चालै जोर ।।
आभै देखूं बादळा , हिवड़ै उपजै नेह ।
साजन होवै साथ मेँ , भळ बरसो थे मेह ।।
चंदै लिपटी बादळी , आभै देखूं भाज ।
घरां पधारो सायबा , काया छोडूं आज ।।

*बातां सरदी री *

दिनड़ा ताता रातां ठंडी ।
पै'रां सूटर छोडां बंडी ।।
छींयां सूती टांगां पसार ।
सूरज भाज्यो छोड बरंडी।।
ठंडा छोडो ताता खाओ ।
सूरज दे दी अब तो झंडी।।
खारक घेवर खाओ भाया ।
लेवण चालां चालो मंडी।।
पगां उभाणा मतना चालो।
चालो घर नै पकड़ो डंडी।।
घरां उडीकै थारी मरवण ।
सांमी आसी बणगै चंडी।।

*अजादी री कुचरणीँ*


1.
हाल
घूंघट काढै दादी
कठै है अजादी ?
2.
कोई सासू
हाल नीँ देवै
भू नै अजादी !
3.
थकां जीन्स
नेतावां नै
पै'रणीं पड़ै खादी
कठै है अजादी ?

पंचलड़ी

मसळ आंखां जाग बता ।
कुण लगाई आग बता ।।
पड़ी चादर मैल जमी । 
कुण लगाया दाग बता ।।
कुण देसी रोटी अठै । 
कुण घालसी साग बता।। 
खावै बै बैठ्या माल ।
अठै फूट्या भाग बता ।।
इण नगरी दोरी जूण ।
जैरी कित्ता नाग बता।।

कांईं करां

मिलै जको भावै कोनीं ।
भावै जको मिलै कोनीं ।।
चावै जको चावां कोनीं ।
चावां जको चावै कोनीं।।
साम्हीं जको दाय कोनीं ।
दाय जको साम्हीं कोनीं।

ताता-ताता दूहा

मिनखपणै रा बोरिया, बण्या भूंगड़ा आज ।
बिलखै जाई बेटियां , सूत्यो मिनख समाज ।।
धन कमावै रीत सटै, मुंडै न रत्ती लाज । 
धूड़ बरोबर तुल सकै, आंधो होयो समाज ।।


.
बरफ पड़ी कसमीर में, धूजियो राजस्थान ।
धोरा होया हेमला , ठाठरगी ही जान।। ,

आपां पुतळी काठ री, नेता हाथां डोर ।
नाच दिखाओ भायला, चालै कोनीं जोर ।।


==========
बोट पड़ैला देसड़ै,नेता होर्‌या त्यार ।
बदळ खोळिया आवैला, गादड़ रंग लगा'र ।।
गादड़ बदळै खोळिया, मन में भूंडी धार ।
खेत रुखाळो भायलां, गादड़ देसी धार ।।
साम्भी नेता डुगडुगी, ढूंढै बांदर तीन ।
बोटां आळै बगत में , खूब जमैला सीन ।।
बण्या मदारी नेतिया, लीला दीवी राच ।
जनता भोळी बांदरी, खूब दिखावै नाच ।।
बोट पड़ैला भायलां , नेता चढग्या घोट ।
टाट बचाओ आपरी, ले सतगुर री ओट ।।
बोटां आळी बगत में, काढां सगळो खोट ।
राज सुंवारै आपणों, झाड़ू जेड़ो बोट ।।

*मत चूको श्रीमान*


भिस्टवाड़ै इण देस नै , कर न्हाख़्यो कमजोर ।
अन्ना भेळै आय परा , काढो काळा चोर ।।
अन्ना आळै अंधड़ में, उडसी डूंगर आज ।
दुनियां सगळी देखसी, भारत रो गणराज ।।
पैसा पैसा कूकतां, नेता बणग्या चोर ।
बिल लोकपाल ल्यांवता, आवै कितरो जोर ।।
आज बगत है आण रो, चालो सगळा साथ । 
भिस्टवाड़ै नै बालस्यां, आज बधाओ हाथ ।।
Related Posts Plugin for WordPress, Blogger...