बगत रा काळा लेख

थूं उण पार
म्हैं इण पार
बीच में
वायरै हाथां 
उधड़तो-उथळीजतो
मून अकूंत थार ।

आडी पटक सड़क
अंट रैयो है थार
जाणैं डट रैयो है
कोई डोकरो
घर री
आब रुखाळतो
छाती माथै लियां
बगत रा काळा लेख ।

सूड़ करां इण देसड़ै

सालज पांच उडीकतां , आयो दिन है हाथ ।
सूड़ करां इण देसड़ै , सगळा आओ साथ ।।
भळै पड़ैला बोटड़ा , नेता लागी पांख ।
जनता जाओ भाड़ में , कुरसी माथै आंख ।।
थूक बिलोसी नेतिया , ऊंची करगै राफ । 
कामज देख्यां लारला , कियां करस्यां माफ ।।
जात बतासी आपणीं , खुद रो देसी डोळ ।
चौकस रैया भायला , कादो देसी घोळ ।।
बातां कैसी आपरी , करगै रोळगदोळ ।
नेता सागी आयसी , बदळ बदळगै खोळ ।।

गुलफी आळो

दो जूण रोटी सारू
गुलफी आळो बेचै 
गळी-गळी गुलफी 
गळी-बास रा टाबर
टाल्ली री टणकार 
सुण-सुण'र
पूगै गाडै सांकड़ै
मोलावै गुलफ्यां
राफां रंगता पूगै घरां ।

नीवड़्यां गुलफ्यां
गुलफी आळो पूगै
खाली पेटी लेय'र
सिंझ्या आपरै घरां
उण रा टाबर
लमूटै बारकर
ढूंढै गुलफ्या रा
बच्योड़ा भोरा
पेटी में लाधै
फगत रातो पाणीं
बै उणीं सूं रंगै राफां
गुलफी आळै री आंख्या
टळकै तातो पाणीं ।

टाबर नित सोवै
लेय'र सुवाल
पापा क्यूं बेच न्हाखै
सगळी गुलफ्यां
गुलफी आळो सोवै
पाळतो सुपना
काल आज सूं कियां
दुगणीं बिकै गुलफ्यां ? 

पूजो मिनखा प्रीत

आंख आपरी तेज है , देखै पड़दां पार ।
खुद रै भीतर मैलड़ो , क्यूं नीं दीठै यार ।। 
काया थांरी फूटरी , कंचन वरणों भान ।
लछण थांरां कुळछणां , बण बैठ्या भगवान ।।
आग लगाओ जगत में , खुद रा सेको रोट ।
डूब मरो रे निसरमो , थांरै कोठै खोट ।।
खोट कमाओ धपटवां , थान जगाओ जोत ।
खूब पटाओ देवता , चौड़ै आग्या पोत ।।
गाभा पैरो ऊजळा , मनड़ां राखो मैल ।
मिनखपणों है भायला , थांरै आगै फैल ।।
बातज मानों सांचली , पूजो मिनखा प्रीत ।
मिनखपणैं नै पूजतां , जग जाओला जीत ।।

लघु कथा

कुचरणीं

काया बूढी
मन पण छक जुवान
मन नै बिलमावण
खेचळ अणथाग
होटां लाली
थोबड़ै पोडर
गालां करीम
आंखां काजळ
काळो चसमो
छींटछिंटाळा गाभा
ऊपर अंतर छिड़काव
बाळां डाई
घणीं ई सजी
डोकरड़ी बाई
गोडां में पण नीं आयो
रत्ती भर तंत
सूझै नीं आंख्यां
कियां बिलमावै कंत ?

* बदळो अबकै थोबड़ा *

जनता घाल्या बोटड़ा , थे थरपी सरकार ।
जनता पांती भूख है , थांरै नित फळियार ।।
पांच बरस में आप तो , पाया कोठी कार ।
जनता बैठी तड़फड़ै , बेजां मारी मार ।। 
जीत बणावै देवरा , रोटी मांगै लोग ।
नेताजी रै भोड में , ऊंदा भूंडा रोग ।।
आस पाळता लोगड़ा , मन सूं घालै बोट ।
जीतै बै ई थोबड़ा , जिण रै मन में खोट ।।
देखै बाजी पळटती , नेता बदळै रंग ।
कुरसी जीतण राज री , छोडै दळ रो संग ।।
जीतण जावो राज रो , अबकै बेली जंग ।
बदळो अबकै थोबड़ा , लोकराज रै अंग ।।
बद-बद टेको बोटड़ा , लोकराज रै हेत ।
अळगा काढो दाणियां , टाळ-टाळगै रेत ।।