*मतलब समझो साफ*

मतलब सटै बात करै , मतलब सूं ई प्रीत ।
ऐड़ा नुगरा भायला , कद होया है मीत ।।
मुळक मुळक बातां करै , ढीली राखै राफ ।
मतलब काढण ढूकिया , मतलब समझो साफ ।।
नित री मांडै हाजरी , लुळ लुळ करै सिलाम । 
समझो म्हारा भायलां , बो काढैला काम ।।
घरां बुलावै आपनै , करै खातरी धाप ।
काम काढ़सी आपरो , चाळा समझो आप ।।
जिको दिखावै आप सूं , भायां जेड़ो हेत ।
बो ठोकैलो फींच में , बेगा जाओ चेत ।।
कांदो मिलै न गूंदळी, चाय मिलै ना खांड ।
बरतन भांडा सांभगै, धरद्‌यो ऊंची टांड ।।
कळजुग भूंडो आवियो , रिपियै रा भी भाव ।
सांभै नीं परमेसरा, बेगा बेगा आव ।।
रिपियो रुळग्यो रेत में, डॉलर चढ्यो अकास ।
रिपिया होसी हाथ में, चरणों पड़सी घास ।।
रिपियो पड़ग्यो बैसकै , डॉलर होयो सवार ।
रिपियै नै कुण सांभसी , कुण नै पूछां यार ।।
रिपिया बंटै देस में , पड़ता लागै बोट ।
भासण आळा बोलसी, ढूंढो म्हां में खोट ।।
बोटां आळी टैम में, करजा करसी माफ ।
जीत्यां पाछै बापजी. खूंजा करसी साफ ।।
कुरसी राखण आपरी. दिया खजाना खोल ।
कुरसी बंच्या बाद में , लेसी पाछा तोल ।।
बोटर गूंगा बावळा , फिरसी नेता लार ।
जीत्यां पाछै नेतिया , चढता फिरसी कार ।।
पढो विग्यापन मोकळा, कितरा होग्या काम ।
नीं बोलैला बापजी . बधग्या कूकर दाम ।।
फोकट बंटग्या लोटिया, होग्यो जग परकास ।
साडी कामळ सींत में , बोटां खातर खास ।।
गांधी थांरा बांदरा , कूदै नो नो ताळ ।
बटका भरसी डील में ,टाळ सकै तो टाळ ।

कुचरणीं

पांच साल 
सींच्या बोट
अनुदानां री घाली खाद
निजूं फायदां रा
छिड़क्या पेस्टीसाइड
लोकतंत्र रै खेत में
पाकगी बोटां री फसल
काटणियां ढूकग्या
हाथां लेय
आसवासना रा हंसिया !
#
आवै जद चुनाव
खड़्या होवै नेता जी
पछै पांच साल
पड़्या रैवै नेता जी !
#
आज संडो है
फेर भी
जीव रै डंडो है
काम सूं मुगती रो
ना कोई ताबीज है
ना कोई गंडो है
कित्तो सुखी है
जको रंडो है !
#
गीरगडी भई गीरगडी
जुवाई मांगी कार बडी
सासू बोली ना म्हैं चढी
ना थांरी मां चढी
चढज्या लाडी रेलगड्डी !

*फगत सरकार चालै*

पांच साल ताईं
ठाट सूं सोवै
पण
पांच सालां बाद
फगत बोटां में
नेता ई उठै
बाकी तो म्हारै देस में
नित पड़ै ई पड़ै
कदै ई काळ पड़ै
कदै ई मेह पड़ै
कदै ई छापा पड़ै
कदै ई टोटो पड़ै
कदै ई रोळो पड़ै
कदै ई जहाज पड़ै
कदै ई बोट पड़ै
बोटर भोळो पड़ै
नेता धोळो पड़ै
नेता रो झोळो
भरणों पड़ै
टैक्सां री मार पड़ै
जनता नै पांच साल
भुगतणों पड़ै
लाख कोसिसां रै बाद भी
पार नीं पड़ै
पछै फाईलां चालै
घूस चालै
डिजायरां चालै
कमीशन चालै
आयोग चालै
जूता चालै
जनता री एक नीं चालै
फगत सरकार चालै !

लाय लगावै लूंठिया

छोडा छोलै छोटिया , मोथा मारै मार ।
लाय लगावै लूंठिया , पड़सी कूकर पार ।।
डोका नीरै डावड़ा , जाण सकै तो जाण ।
लारै आं रै लागगै , होसी बेजां हाण ।।
बाबा बणावै बांदरा , राम रटावै रोज ।
खोट खिण्डावै खोड़ला, मिजळा मारै मोज ।।
टमचर फूटै मावड़ी , आज दियाळी साज ।
टाबर कूकै मीठै नै , दिखै न कांदा आज । 
कूकै बैठ गरीबड़ा ,करतां पूजा पाठ ।
खस खस काया होम दी, ठोठ मनावै ठाठ ।
बोखा मांगै बोरिया, दांतल मांगै दाख ।
रोडा मांगै कांगसी , टळै न जतना लाख ।।
मन रा मालक भायलां , कीं तो राखो चींत ।
खुद रो घर जे खोदस्यो ,ऊपर पड़सी भींत ।।
हक रो खावो मोकळो , भरो आपरो पेट ।
पांती खोस गरीब री, क्यूं नोट लगाओ जेट ।।
रात आज री कुजरबी , आवै कोनीं नींद ।
कुण नै घोड़ी पटकसी , कुणसो बणसी बींद ।।
नेता धोकै देवता , चमचा बोलै जात ।
पेट पिलाणां ढूकसां , आप बणाओ बात ।।

<> नेता मोटो राम सूं <>

रोटी सेकै आपरी , लगा देसड़ै आग ।
कळपै सगळो देसड़ो , नेता बागो बाग ।।
देसधरम री नीतियां , दीवी सगळी टाळ ।
रावण बणग्या नेतिया , लंका आळी ढाळ ।।
जात धरम में बांटगै , रोपै उण में राड़ ।
कियां बचैलो खेतड़ो , खावण ढूकी बाड़ ।।
कीं दिन रैवै राज में , कीं दिन रैवै जेल ।
जाण सकै ना राम जी , नेता जी रो खेल ।।
नेता मोटो राम सूं , बेटो उण रो बाप ।
झींटा खोसै नेतियो , बेटो देवै थाप ।।
भासण भूंसै नेतिया , चोड़ी करगै राफ ।
कुरसी माथै बैठगै , करै खजानो साफ ।।
हाथ दिखावै नेतिया , कर कुरसी धणियाप ।
सगती सगळी हाथ में , नाप सकै तो नाप ।।
गांवां आया धाड़वी , मारो करड़ी चोट ।
धूड़ चटाओ भायलां , मत ना देवो बोट ।।
कीमत जाणों बोट री , सीमो मत ना होठ ।
 कामल ढूंढो नेतिया , छोडो ठूंठा ठोठ ।।
रात काढदी आंख में , आई कोनीं नींद ।
इतरा पैदल चालतां , पूग जांवता जींद ।।
भासण आळी गोळती , बांटै नेता रोज ।
जनता चूसो ठाट सूं , पूरी देवै डोज ।।
जनता चावै बावळी , देस-धरम रो मान ।
नेता घूमै फाड़ता , भासण आळा थान ।।
नेता ढूंढै जीतड़ी , बोट मसीना बंद ।
जन सेवक ई जीतसी , जनता काट्यो फंद ।।

*चुणावी कुचरण्यां*

1.
पैली चालै
दारू-डोडा
अमल-अफीम
आटो अर सोट
पछै घलै
जीतणजोग बोट !
2.
दिन में चालै
रैली अर भासण
रात नै चालै
दारू अर रासण
हारै युधिष्टर
जीतै दुसासण !
3.
नेता जी रै
चढगी घोट
हटावण रो है
टूणों एक
सगळै गांव रा
घालो पूरा बोट !
4.
ना विकास पर
ना बात पर
बोट मांगै
नेता खुद री
जात पर है !
5.
पढता हा जद
हा सरारती
होमवर्क करता नीं
तो मैडम मारती
अब जीत'र बणसी
शिक्षा मंतरी

फेर नेता जी ढूंढसी
मैडम री जंतरी !
6.
नेता जी नै
देवो चावै
कित्ता ई फोट
पण मत चूको
देवण सूं बोट ।
7.

पैली
घलता बोट
फैल नेता नै
पांच साल बाद
देंवता फोट
अब
बोट होवै पोल
इणी कारण
पांच साल ताईं
चालै पोलमपोल !

पांच पूंछ आळा दूहा

1-
सिंझ्या ढळगी सायबा ,चंदै भरली बांथ ।
खडी़ उडीकूं बारणैं , कद आवैला नाथ ॥
खरची खूटगी लागै ॥
2-
ताचक बैठी गौरडी़ , गोखै साम्हीं पंथ ।
ऊपर चमकै चांदियो ,कद आवैला कंत ॥
बो काईं फ़ांक ल्यासी ॥
3-
इण गेलां ई आवसी , कंत भायली आज ।
पळ न छोडूं पगथळी , बांथां भरस्यूं आज ॥
रूई री पांड कोनी बो ॥
4--
थारै हाथां जीम सूं , कंत पधारो आज ।
नींतर भूखी पोढ सूं , सेजां रा सिरताज ॥
पे डे होवैलो आज ॥
5-
भीतर ढाळूं ढोलियो , ऊपर छाऊं आंख ।
थांरै आयां सायबां , म्हारै आवै पांख ॥
कातरो है का फ़िड़कली ॥