*उडीक*

उडीक ही
थांरी
अर
मेह री 
म्हे आयो 
पण
थे नीं अया 
मेह थमग्यो
पण
नीं थमी
उडीक थारीं !

थे
मेह होंवता
कदास
थमती
अमर होयगी
उडी थांरी !

*गोळी*

गोळी आळा गोळी दे ।
भरगै म्हानै झोळी दे ।।

दादो म्हारो पटवारी
काम बां रो सरकारी
कीमत देसी बै सारी
थूं चरकी हिंगोळी दे ।
गोळी आळा गोळी दे ।
भरगै म्हानै झोळी दे ।।

खाटी मीठी धरदे थूं
झोळी म्हारी भरदे थूं
सुपनो सांचो करदे थूं
लाल दे या धोळी दे ।
गोळी आळा गोळी दे ।
भरगै म्हानै झोळी दे ।।

धोबो गोळी बाई री
आधी पड़दी भाई री
बाकी ताबै आई री
खाथी दे या होळी दे ।
गोळी आळा गोळी दे ।
भरगै म्हानै झोळी दे ।।

*कियां जीयां बाबा*

म्हे जाणां कियां म्हे जीयां बाबा ।
नित लोई रा घूंट पीयां बाबा ।।
अब कांदा मिलै ना मिरच मसाला ।
दूध नै बैठ्या नित टीयां बाबा ।।
रिपियो खावै रोज गुड़क गुळाची ।
जाय बैठ्यो डॉलर छींयां बाबा ।।
मूंघीवाड़ो ओज्यूं और बधसी ।
राज घुरकावै नित ईंया बाबा ।।
संत अंत ले आज ढूक्या लूंटण ।
किंया साम्भा इज्जत धीयां बाबा ।।
खुद रै हाथां म्हे थरप्या पाटवी ।
म्हानै पीसै भोत मींयां बाबा ।

*जातरा अर मील भाठा*

मनरळ्यै मीत सूं
मिलण जांवतां 
मन में होवै
कितरी खाथावळ
पगां नै पण नीं होवै
ऐड़ी कोई उंतावळ
पग भाड़ेती मन रा
भाजै मन लारै !

मिलण-बतळावण री
उपड़ती चावना रै
आडा आंवता
मारग रा मील भाठा
डाडा खारा लागै
गिणना ई पड़ै सगळा
मिंडी सूं सरू कर
छेकड़ली मिंडी ताईं ।

कई बार
जावणों पड़ै
ऐड़ी जातरा माथै
जकी रुचै नीं मन नै
ऐड़ी घड़ी
कित्ता बेगा नीवड़ै
मारग रा मील भाठा
एक नीवड़ै नीं
दूजो झट आ ढूकै !

*डांखळो*

ऊंदरां में डागधर हो पूंछलो परभाती ।
करतो जणां इलाज आंख्यां राखतो राती ।।
        ऊंदरी रै होग्यो जुखाम
         बोल्यो कर एक काम
रंडकी तूं खाया कर करगै गुलफी ताती ।।

आओ आपां स्याणां बणां

आपणीं निजरां साम्हीं
लोगां बणाया मारग
उण मारगां आपां 
चाल्या जित्तै चाल्या
नीं चाल्या जद
भगाया बां लारै पड़
पैली तो बै 
मुळक्या बांकी राफ
पछै बजाई ताळी
बोल्या-जाओ रे डोफ्फां
जाबक ई बावळा हो थे
ना ददियो है थां में
ना है तंत
थांरो तो भाइडां
नेड़ै है अंत !

उण रै बाद सूं
बै घिस रैया है राछ
आओ !
उण अंत नै
आपां टाळां
जिकी बणाय राखी है
बंचण री आस में
ऊंची बाड़
उण बाड़ नै
आज ई बाळां
आपां भाजां अब
उणां रै लारै
आओ दिखांण
आपां कीं स्याणां बणां !

आओ आपां
गरीबी री रेखा रै
नीचै सूं निकळ
निरवाळी रेखा खींचां
आं स्याणां नै राखां
उण रेखा नीचै !

*मौन धरती*

मौन हो तुम
किस के वियोग में
जपती हो किसे
कौन है अराध्य तुम्हारा
किस के विरह की
अग्नि धारे हो
अपने अंतस में !

पानी आता है
बहा ले जाता है
पवन आता है
उड़ा ले जाता है
तेरे तन से मिट्टी
बता धरती
क्या गुजरती है
पल-पल तुम पर ?