*काचर-काकड़ी री कुचरणीं *

काकड़ी बोली काचर सूं
थूं बेजां बेईमान है रे
अळसीड़ा काचरिया
पेट में इस्यो बीज राखै
जको मणां दूध 
फाड़ देवै
इणीं खातर थंन्नै
खेत में कोई नीं बीजै
थांरी बेल मतै ई ऊगै
अर थूं मतै ई लागै
थंन्नै छोल-छोल
लुगायां माळा में बींध
काचरी बणा लटकावै
थूं तो जद टिकै !

काचर बोल्यो
रैवण दे ऐ
बिन्यां काकै री काकड़ी
थूं कांईं घाट है
थूं तो जाबक ई
बावळी टाट है
थंन्नै जे कोई कोरी
खाली पेट खावै तो
बुखार चढ जावै
अर बो मांचो झाल लेवै
इणीज कारण
थांरै माथै लोगड़ा
लूण मिरच बुरकावै
जद थूं थांरो
सुवाद बतावै
थूं बा ई है नीं
जिण रै कारण
बापड़ी काकी रै
लात पड़ी
अर डरती गाया गीत !

छोरी : तीन चितराम

-एक-

गांव रै स्कूल में 
मन सूं पढै़ छोरी
स्कूल में मिल्यो
होमवर्क
स्कूल में ई सळटावै
फ़ेर घरै आवै
स्कूल रा सबजैक्ट
हिन्दी-गणित-विज्ञान
घरां आंवतां ई
बण जावै
चौको-चूल्हो-बुहारी
भांडा-बरतण-तरकारी !

-दोय-

गांव अर सै’र री
छोरी में देखो फ़र्क
सै’र री छोरी रै
स्कूल रो काम 
होवै होमवर्क
गांव री छोरी रै 
फ़गत घर रो काम ई
होवै हो्मवर्क !

-तीन-

सै’र में
छोरी जे नीं करै
हो्मवर्क
तो स्कूल में पडै़ फ़र्क
गांव में
छोरी जे नीं करै
होमवर्क
तो घर में पडै़ फ़र्क !

माळा रा मिणियां

माळा रा मिणियां
घिसग्या फेरतां-फेरतां
ना सुख मिल्यो
ना परमेसर
जोड़ायत ही स्यांति
बा ई सो बरस करगी
अब बाबो जी बण्यां
घाटो ई घाटो
कुण घालै 
डैण नै आटो
छेकड़ बणग्यो डैण
खुद परमेसर
बतावै तो कोनीं
पण सोचै तो है
अब पकड़ी है
असली लैण !

*सुणल्यो डंकै चोट*

जातरां ढूंढै बोटड़ा ,  बैठण  कुरसी राज । 
कोई बोलै सन्देसड़ा , कोई कथै सुराज ।।
गरमी  भारी कोझकी , भूंडा  बेजां  हाल ।
कीं  बोटां रै  कारणै ,  नेता  बाळै  खाल ।।
खेत  खळां  नै  छोडगै , घूमो नेता  लार ।
नेता कुण रो बापजी, मत ना खाओ मार ।।
धरती कोनीं कामड़ा, भाषण है अणथाग ।
कुण जाणै कुण थामसी, भाषण आळी आग ।।
कोई बोलै कर दियो , देखो कित्तो विकास ।
कोई सित्यानास कथै, कियां करां बिसवास ।।
ना भाषा  है न पाणीं , ना  बोलण में सार ।
भाषा सुण सुण ओपरी , डूब्या काळी धार ।।
बोटज मांगो मोकळा, बैठो जातरा रथ ।
भाषा देवो बापजी, मत ना करो अनरथ ।।
म्हे देवांला ऐसकै , भाषा  खातर बोट ।।
बोलै  गूंगा भोळिया . सुणल्यो  डंकै चोट ।

*काळजो मत छोड*

तावड़ो देख
काळजो मत छोड
च्यार दिनां में देखी
बादळिया आसी
उतराधै सूं
हड़हड़ करता
ओ तावड़ियो भाजसी
देखी दड़ांछंट
खुर-खोज ई नीं लाधैला
धरती रै ओळैदोळै
भळै इण तावड़ै रा !

आव
इत्तै आपां
रूंख बंचावां
बादळां रो माजणों
ऐ ई मारसी
बळबळतै तावड़ै में
जीव-जूण तारसी
पकड़ झींटा
बादळां नै देखी
रूंख ई उतारसी !

सुरजीत पात्तर की पंजाबी कविता का अनुवाद

*पांख्यां दे दे परमेसर*

दीठ में
हरमेस बसै थूं
म्हारा व्हाला मींत
आंख्यां है
देखण बापड़ी
भोत खसै
आंख्यां सूं 
दिखै नीं पण थूं ।

उड'र आवणों चाऊं
थांरै सांकड़ै
म्हारा व्हाला मींत
पण पांख्यां कठै
ऐ आंख्यां ले लै
म्हारा परमेसर
अर दे दे पांख्यां
आंख्यां छोड पांख्यां सूं
उड'र जाऊं बठै
जठै म्हांरो मीत बसै !