कागद राजस्थानी

रविवार, 20 मई 2012

हंसोकड़ी कविता

================
जुलम करो ना टैगियो , 

बगसो म्हानै आप
================

टैग करै है टैगिया , ताबै लागी बात ।
टैगां सारू बापड़ा , जागै आखी रात ।1।
टैग लगाया टैगियां , भरदी म्हारी वाल ।
दूखण लागी आंगळी, डो'तां डो'तां माल ।2।
उपड़ै बां रै कुळकुळी, खोसै म्हारी खाल ।
अरै विधाता ढाबलै , आं भूंडां री चाल ।3।
भींत भायला जाण गै,बाबै जी रो माल ।
ऐ तो खूंटा रोपसी , कुण सकै है पाल ।4।
फोटू खींचै आपरी , आय लगावै टैग ।
राजी होवै मोकळा , चेप्यो जाणै पैग ।5।
फेसबुक हत्थै लागगी , कोनीं पालणहार ।
नागा नाचै टैगिया , भोळा खावै मार ।6।
टेगू दादा बगस दै , कोनीं कोई आस ।
कूद कूदगै खूंदसी , करसी भींतां नास ।7।
आप चेपसी लाइकड़ा , दूजां सूं कोमेंट ।
आस लगावै मोकळी , करदै ढिबरी टैंट ।8।
बांचै कोई बातड़ी , राखै कोनीं आस ।
टैग लगावै टैगियां , आपी होज्या पास ।9।
जुलम करो ना टैगियो , बगसो म्हानै आप ।
करां अरज करतार सूं , थांनै लागै पाप ।10।

कोई टिप्पणी नहीं:

एक टिप्पणी भेजें

Related Posts Plugin for WordPress, Blogger...
इस गैज़ेट में एक गड़बड़ी थी.