डांखळो

डांखळो
--------
सगळी बातां रो जाणकार मानतो खुद नै कवि दादो ।
बातां रो मतलब बतावण रो करया करतो खुलो वादो ।
                         पड़ती   जद पार नीं
                       मान्या करतो हार नीं
रीसां बळतो कर दिया करतो भच्च देणीं बात रो कादो ।।

मेह होवै तो म्हे होवां

 मेह होवै तो म्हे होवां

तपती चालै
बळबळती बगै
बादळां नै झूरती
आभो धरती एक करती पून !

झूंपड़ा तपावंती
गाछ सुकावंती
पाणीं बाळती
लू बणी बगै पून
बादळां रो सोधती
अंतस पाणीं !

लूआं रो
फंफेडीज्योड़ो धोरी
आभो तकै
करै अरदास
मेह करो
मेह होवै तो
म्हे होवां !

कुचरणीं

छेद अर भेद
========
साची कै'ग्यो बाबो
छेद अर भेद ढाबो
छेद अर भेद
कदै ई
नीं खोलणां
जे ऐ खुल जावै
तो सो कीं ढुळ जावै !

कुचरणीं

कुचरणीं
=====
छोरै खातर
छोरी देखण गया
बाबो अर माऊ
छोरी आळा
छोरी दिखाय'र बोल्या
छोरी घणीं स्याणी है
बेजां चतर है
काचर नै काट्यां बिन्यां
काचर रा बीज गिणलै !

माऊ बाबो बोल्या
बस बस आ ई चाईजै
छोरी के है
एक चीज है
म्हानैं तो इस्सी ई चाईजै
क्यूं कै छोरो म्हारो
काचर रो बीज है !

कुचरणीं
=====
छोरै खातर
छोरी देखण गया
बाबो अर माऊ
छोरी आळा
छोरी दिखाय'र बोल्या
छोरी घणीं स्याणी है
बेजां चतर है
काचर नै काट्यां बिन्यां
काचर रा बीज गिणलै !

माऊ बाबो बोल्या
बस बस आ ई चाईजै
छोरी के है
एक चीज है
म्हानैं तो इस्सी ई चाईजै
क्यूं कै छोरो म्हारो
काचर रो बीज है !

जोनियो जाडू

जोनियो जाडू
========
म्हारो दिल टूटग्यो
दादी सूं बोल्यो
जोनियो जाडू
दादी बोली-
कोई बात नीं मला
च्यार दिनां में देखी
आपी जुड़ जासी
नित खाया कर
गूंद रा लाडू !

दूहा-गुट रा गुटका

गुट रा गुटका
========
गुट रा गुटका सांतरा , मीठ लागै भोत ।
गुट सूं बारै जांवतां , साम्हीं दीखै मौत ।1।
गुटज बणाओ भायलां , गुट में बेजां मौज ।
निरगुटियां रा आपनै , खुर लाधै ना खोज ।2।
गुट में रांधी खीचड़ी, गुट में लीवी खाय ।
गुट बारै री लापसी, आवै कोनीं दाय ।3।
गुट रो तूंबो सेव है , निरगुट आम्बो आक ।
गुट रा ढकल्यो ऐबला , निरगुट काटो नाक ।4।
गुट रो लेखक सांतरो , मांडो चावै गाळ ।
निरगुट मांडै टाळवीं ,उण नै देवो टाळ ।5।
गुट री काढां चौपड़ी , गुट नै देवां  छाप।                                                     निरगुट आळा छापगै ,क्यूं कमावां पाप ।6।

गुट आळा ई तारसी, जास्यां सागर पार ।
पासपोर्टड़ा त्यार है ,आदेसां इंतजार । 7।

 धन रो मोटो फायदो , दिल नै देवै जोड़ ।
बिना फायदै भायला , यारी देवै छोड़ ।8।

मतलब पेटै भायला , मतलब छोडै यार ।
मतलब री माया चलै , मतलब निकळ्यां पार ।9।

गुटबंदी में मौज है , गुटबंदी भगवान ।
गुट रै साथै चालगै , काम चढै परवान ।10।

निरगुटिया तो ऊतिया , डोफ्फा गूंगा सांड ।
निरगुट चाबै आकड़ा , गुट में बंटै खांड ।11।