कागद राजस्थानी

गुरुवार, 10 अप्रैल 2014

गुलफी आळो

दो जूण रोटी सारू
गुलफी आळो बेचै 
गळी-गळी गुलफी 
गळी-बास रा टाबर
टाल्ली री टणकार 
सुण-सुण'र
पूगै गाडै सांकड़ै
मोलावै गुलफ्यां
राफां रंगता पूगै घरां ।

नीवड़्यां गुलफ्यां
गुलफी आळो पूगै
खाली पेटी लेय'र
सिंझ्या आपरै घरां
उण रा टाबर
लमूटै बारकर
ढूंढै गुलफ्या रा
बच्योड़ा भोरा
पेटी में लाधै
फगत रातो पाणीं
बै उणीं सूं रंगै राफां
गुलफी आळै री आंख्या
टळकै तातो पाणीं ।

टाबर नित सोवै
लेय'र सुवाल
पापा क्यूं बेच न्हाखै
सगळी गुलफ्यां
गुलफी आळो सोवै
पाळतो सुपना
काल आज सूं कियां
दुगणीं बिकै गुलफ्यां ? 

कोई टिप्पणी नहीं:

एक टिप्पणी भेजें

Related Posts Plugin for WordPress, Blogger...
इस गैज़ेट में एक गड़बड़ी थी.